Electric current-in mi a manin, thihna hial emaw hliam emaw a thlenin a tuartute hnenah zangnadawmna pek theih dan a awm tih hre turin mipui an duh tih Power & Electricity department hotute chuan an sawi.
P&E hotute chuan electric current man an awmin, department lam thiam loh emaw mimal/ mipui thiam loh pawh nise, zangnadawmna (ex gratia) inpek theih dan a awm a, department lam thiam loh pawh ni chiah lo mah se, a tuartute hriatthiam pui tak chungin thil kalpui thin a ni tih an sawi.
Department lam inthlahdahna thil avanga vanduaina hi thleng a nih chuan, nunna chan phah an awmin ex gratia cheng nuai 10 pek theih a ni a, pianphunga harsatna an neih hlen phah a nih pawhin, an hliam dan azirin nuai 10 atanga Rs. 50000 inkar thleng chhawmdawlna inpek theih a ni a, damdawi ina an inenawl rei dan leh pianphunga rual ban loh phahna an nei lo a nih pawhin damdawi ina an inenawlna senso intum sak theih dan thlengin a awm tih an sawi.
Hetiang bawk hian, department thiam loh ni lem lo, vanduai thila lo chesual palh an awm pawhin ex-gratia inpek theih dan hi a awm a; nunna chan cheng nuai 2, pianphunga rual ban loh phah tan cheng nuai 1 atanga Rs. 20000 inkar pek theih niin, damdawi ina inenkawlna senso pek theih dan a awm bawk tih an sawi a ni.
Chutihrualin, ex gratia inpek dawnin, tih hmasak ngai leh document thehluh ngai hrang hrang a awm ve a, nunna chan hnena ex gratia an pek dawnin, a dawngtu tur diktak, danin a phut ang ngei hnenah chauh pek theih a ni tih an sawi.
Thuthar thehdarhtuten an zawhnaah Power & Electricity minister F Rodingliana chuan, tunhnaiah electrical accident avanga nunna chan leh hliam tuar hriat tur an awm nual a, department pawhin hrehawm an ti a. Zangnadawmna an dawn theih angte pek tumin, kawng engemaw tala puih an tum tih a lo sawi tawh a. Chutihrualin, mipui lam pawh electric ban ding sa leh hrui inthlung sa tawh hnaih lutuka in sak leh in zawmsan loh a tul bakah fimkhurna dang theih ang anga kan kalpui a tul ve bawk tih a sawi a ni.
P&E minister hoa department hotute thukhawm chuan electrical accident thlengah sawrkar dan anga nunna chan leh hliam tuar, sawrkarin chhawmdawlna (ex-gratia) a pek theih ang chu rang taka pek tura hma lak an rel a. Tunhnaia Bungtlang South-a hmeichhe naupang rawtuai khawrh tur electric current-in a man avanga nunna chan chu, ramria duty BSF ho line tlufual a ni tih hriat a ni a, BSF pawh line siamtha tura hriattir niin, hun tiam chhunga an siamtha lo a nih chuan power supply pek loh mai nise tiin an rel tih sawi a ni.
P&E department hotuten zawhna an chhan danin, tunah hian an department-a sanction post chu 2155 a ni a, hetah hian post 845 chu hnawhkhah loh a ni. A nih dan tur ang takin kal dawn ta nise, engineeer, office-a thawktu leh thir bana lawn tur thlengin, tuna thawktu awmsa bakah thawktu an mamawh belh zat chu 3900 a ni.