Ella Langley “Choosin’ Texas” kar 5 a No.1 ta

Ella Langley “Choosin’ Texas” kar 5 a No.1 ta
Ella Langley hla hit “Choosin’ Texas” chu Billboard Hot 100 (US singles) chart-ah a No.1 a, he chart-a a zawn lova kar nga a No.1-na a ni ta a, hmeichhe zaithiam zingah he chart-a hla pakhat kar nga chin No.1 nih pui thei 26-na a ni. He hla hi February thla laihawl khan chart No.1 a rawn ni tan a, he chart-a Langley hla No.1 ni thei hmasa ber a ni a, April ni 1 khan a official music video an tichhuak a, chu chuan a rawn vawrh thar leh ta a ni. “Choosin’ Texas” hla hi Hot Country Songs chart-ah chuan kar 19 a No.1 tling tawh bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
“Choosin’ Texas” hian kar khat chhungin stream maktaduai 23.9, radio airplay ngaithlatu maktaduai 43.2 leh sales 8,000 a nei thei a, hei hi a kar nga nan chart-ah a No.1 pui leh ta a ni. Ella Langley hi country music chauh record thin hmeichhe zaithiam zingah Hot 100 chart-a hla pakhat kar nga chin No.1 pui thei pahnihna a ni a, Debby Boone hnung a zui ve ta a ni.
BTS “Swim” chu No.1 atangin No.2-ah a tawlh a, Olivia Dean “Man I Need” chu No.3-ah bawk a la awm a, a hla dang “So Easy (To Fall in Love)” chu No.7 atangin No.6-a a insawn thar ve leh ta bawk.
Chart No.1 hlui Bruno Mars “I Just Might” chu No.4-ah bawk a la awm a, No.1 hlui bawk Alex Warren “Ordinary” pawh No.5-ah bawk a la awm a, he hla chart top 5-ah kar 44 a lang tling ta a, The Weeknd “Blinding Lights” lehpelin, top 5-a lan reiah pahnihna a ni ta a, kar 47 top 5-a lang thei Shaboozey “A Bar Song (Tipsy)” chiah a pha lo.
HUNTR/X “Golden” chu No.6 atangin No.7-ah a tawlh a, PinkPantheress & Zara Larsson “Stateside” chu No.8-ah bawk a la awm a, chart No.1 hlui Taylor Swift ‘The Fate of Ophelia’ chu No.9-ah bawk la awmin, Kehlani ‘Folded’ pawh No.10-ah bawk a la awm.