Excise & Narcotics Department leh Central YMA hnuaia ruihhlo dotu Central Anti Drugs Squad (CADS) thawkdun chuan June 2 chhun dar 12.10 khan Sihphir Neihbawi (Sethup Kawn) ah heroin gram 971 (hawng 67) an man a, he thila inhnamhnawih mi pali- Daniel Malsawmdawngliana (47) Zokhawthar Champhai, Suwar Uddin Laskar (47) leh Basir Uddin Laskar (26) Rajghat/Bagha Cachar Assam mi ve ve leh Hifjul Bahar (27) Karimganj Assam nia inchhal an man. Heroin phurh kualna atana hman lirthei pahnih – Hyundai Santro MZ-01 D 8202 leh Bolero AS-01 EU 9735 pawh hren a ni.
Heroin hi Zokhawthar atanga an lak, Assam-a tihral tum a ni a. An vai hian ND&PS Act tlawhchhanin thubuai siamsak an ni. Court-a thiamloh an chan chuan kum 10 atanga kum 20 jail tan theihna leh sumfai cheng nuai 1-2 thleng chawi theihna a ni.
Saitual Police pawhin June 1 khan heroin gram 587 an man a. Keifang Kualmawia lirthei veivak an endiknaah Churachandpur atanga Aizawl lam pan Bolero Neo MN-01 AX 0569 chu Thawhtanni zing dar 3.00 vel khan tih din a ni a. He lirtheia chuang Nengshi Haokip (51) Salbung Churachanpur, Manipur chu rinhlelh vangin hmeichhe constable-in a taksa a endik a, Section 50 NDPS Act hnuaiah ama phalna ngeiin SDPO hriatpuinain a endik a ni.
A taksa an enfiahnaah a thawmhnawh chhunga thuhruk sahbawn bawm 50, a chhunga heroin awm hmuhchhuah a ni a, a bag ken pawh endik a ni. Heroin gram 587 hu man a ni a, Saitual Police Station-ah thubuai ziahluh a ni.
June 3 khan Champhai Police chuan Chalbawia Junction Khankawn Police Check Gate-ah lirthei an endik a, chawhnu dar 3.50 khan Champhai atanga Aizawl pan tur maxi cab-a chuang Wesley Thangmawii, Zokhawhthar bag atangin heroin hawng 14 an man.
Ruihhlo kengtu hian heroin a keng tih a hriat loh thu a sawi a. Hotel management zir tuma Aizawl kal tur a ni a, a cousin Lalramchangi leh a nu M Thangi, Zokhawthar-ten a bag an siamsak a, a hriat loh laiin heroin hi an lo dah niin a sawi. Hei hi police chuan chhuizuiin, M Thangi leh Lalramchangi hi Zokhawthar-ah thu zawhfiah tura lak nghal an ni.
Champhai Police hian Nilaini chawhma khan Champhai atanga Aizawl lam pan maxi cab pakhata chuang hmeichhe pahnih chu ringhlelin, Champhai District Child Protection Unit Office-ah gazetted officer hmaah an taksa an dap a, Lalhriatzuali (25), Champhai Bethel-a cheng nia insawi hnen atangin heroin hawng 3 an man a. Hmangaihzuali (47), New Champhaia cheng nia insawi kut atangin heroin hawng 3 tho an man.
Nilaini vek khan Aizawl pan tur maxi cab dang pakhata chuang Lianneihmawii (21), Tuirial Aizawla cheng nia insawi chu ringhlelin, Govt. GM Higher Secondary School-ah gazetted officer hmaa dap a ni a. A taksa depa a thuhruk heroin hawng 1 an hmu chhuak. An mi mante hi ND&PS Act hmangin thubuai an siamsak a ni.
END/CADS leh Police-in heroin man
