April 18 khan pro-Palestinian protestor 100 chuang Columbia University, New York-a inkulhte chu police ten an man a. Khata tang khan US a university campus hrang hrang New York University, Yale University leh University of Texas te pawh telin lungawilohna lantira campus a inkulhna a thleng a. Heng lungawilohna lantirtute hian October 7 a Hamas tena Israel an beih leh a hnua Israel-in chhangleta Gaza Strip-a indona a kalpui duhlohna an lantir a ni.
Lungawilohna chu?
October 7, 2023 khan Hamas te chuan Israel beiin civilian 1,200 chuang tihlumin mi 250 mitang atan an hruai bawk a. Israel chuan phuba lain Gaza Strip a runnaah mi 34,000 chuangin nunna an chan phah tawh a, nunna chan zinga a tam ber te hi naupang leh hmeichhiate an ni.
Israel-Hamas indonaah inkahhai awm se tia rawt reng a ni a, kar kalta khan Columbia-a zirlai thenkhatte chuan university campus lawn ah camping neiin chu chu ‘Gaza Solidarity encampment’ an tia a, chu chu lungawilohna an lantirin a thlen san ber lai a ni bawk.
An ngiat ber chu: Columbia university chuan Israel nena inzawmna leh inlaichinna nei company/institution te atangin fund a dawng tawh tur a ni lo va, ‘Israel apartheid’ kalpui atangin profit a nei tawh tur a ni lo, University investment tihah financial transparency a awm tur a ni a, pro-Paletinian movement kalpui mekah students/faculty te amnesty pek an ni tur a ni tih a ni.
University-a student newspaper Columbia Daily Spectator te chuan April 23 khan Columbia College chuan hneh takin Israel fund hnawlna divestment referendum ah chakna an chang a ti a. Referendum chuan zirlaite chu university chuan Israel tanpuina hnawlin, Tel Aviv Global Center titawpin leh Columbia in tel Aviv University nena dual degree programme an kalpui a ti tawp tur a ni an tihah zirlai te chuan a thlawp zawngin vote an pe a ni an ti.
Columbia University hian student movement lamah history hausa tak a nei nual a. Tun anga nasaa zirlai tena campus a harsatna an siam hnuhnun ber erawh kum 1968 a Vietnam War laia US sorkar hmalakna an duhlohna leh university policy te chu racist tia an duh loh vang a ni. Kha mi tum pawh khan police te chuan mi 700 chuang an man a ni.
Lungawilohnaah ngaihdan?
Lungawilohna lantir chu a duh leh duhlo an inthen nasa tial tial tawha ngaih a ni a. pro-Palestinian movement te chuan an movement kalpui chu peaceful leh an duh leh tum ber chu Gaza-a ‘genocide’ thleng mek tihtawp US inrawlh dan an duhlohna chu a ni. Chutih lai chuan Jewish student group te thung chuan lungawilohna lantirah anti-Semitism (Juda te ngaihtheihlohna) a awm thu leh Jews te chuan campus chhungah himin an inhre lo an ti ve thung.
Mi tam tak te chuan lungawilohna lantir chu campus chhunga anti-Semitism nasa tak lantirna an ti a. New York City mayor Eric Adams chuan Columbia Uiversity a anti-Semitism irhchhuak chu ‘rapawm leh tenawm’ tiin a sawi a. Israel sorkar official X account pawhin Columbia university a lugawilohna lantirna video chu retreet in protestor te chu ‘terrorists’ a ti bawk.
Democratic Congresswolen leh Muslim ni bawk Ilhan Omar thung chuan lungawilohna lantirtute chu thlawpin ‘ram pumah Gaza Solidarity movement an tialh a ni’ a ti a. “Zirlai tena an beisei aiin a nasa zawk a, hetianga lungrualna hi ka beisei a ni” tiin a sawi.
April 21 khan White House pawhin thuchhuah siamin ‘tun hnaiah innghaisakna leh Jews te laka tharum hmang tura inturna te kan hmu a ni. Hetianga Juda te huatna hi a demawm a, a hlauhawm bawk a, college campus emaw ram chungah khawiahmah hmun a chang tur a ni lo’ tiin a tarlang.
Campus ten Israel atangin fund an dawng thin em?
Lungawilohna zirlai tena an lantir hi ‘disclose and divest’ tih niin chu chu non-violent Palestinian kaihhruaia Israel economic lama hrek leh boycott tura nawrna movement Boycott, Divestment and Sanctions (BDS) atanga irhchhuak a ni.
Associated Press in MIT zirlai thusawi a tarlan dan chuan MIT chuan Israel Defence Ministry atangin tun hnai kum sawm kalta khan $11 million a dawng a ti a. University of Michigan a protestor pakhat pawhin an university chuan Israel company emaw contractor te atanga hlawkna dawng investment manager hnenah $ 6 billion chuang a pe tawh a ti bawk.
Mahse, University of Michigan chuan Israel company te ah direct investment tih kan nei lo tithungin indirect investment atanga fund an hmuh pawh university endowment fund $18 billion a 1% chauh a ni a ti bawk. New York Times pawhin university te chuan an investment ah direct control nei lovin chu ai chuan asset manager te an hmang mai zawk thin a ti bawk a. Uiversity administrtor thenkhatte pawhin an endowment fund te chu Israel nena inzamwna nei company te a investment tih chu a beitham lutuk an ti bawk.
Federal Student Aid database chuan kum 2020-22 chhung khan Columbia University chuan Israel atangin foreign gifts leh contract $ 2 million chuang hret a dawng a ti a. Mahse, chung sum te chu Israel khawi hmun atanga pek nge, tute nge investor te, fund te chu eng atan nge hman a nih sawi lan a ni lo.
Chutih laiin university te chuan ‘anti-Israel protest’ kalpui mek a nih avangin investor te funding an hloh mek bawk a. Law and investment firm te chuan zirlai lungawilohna lantir mek te chu hna an pek lohtur thu leh an graduate hnuah pawh an chhawr dawn loh thu an sawi tawh bawk a. Campus funding an pek titawp tur sawi chiang tawh zingah venture capitalists David Magerman leh Jonathon Jacobson te, US ambassador to China ni thin Jon Huntsman te pawh an tel.
Eng nge thleng thei?
US pumah university administrator te chua zirlai lungawilohna leh sorkar atanga nawrna te chu inbuk tawka kalpui an tum laiin boruak a sang hle reng a. University hmun dang dangah pawh lungawilohna lantir zel a ni.
Hetih lai hian Gaza indona chu kalpui zui zel niin Israel chuan US Congress in tanpuina $ 13 billion a pek hnuah Gaza chu airstrike hmang te in a la beisel bawk a. Israel chuan Palestinian refugee 1.4 million te tawmna leh Hamas battalion la awm chhunte inkulhna tia a sawi Rafah khawpui chu khawvel ram hrang hrang te US ngei pawhin ti lo tura a nawr chungin run a tum tia sawi a ni a. Israel prime minister Benjamin Netanyahu chuan Rafah chu an luhchhuah tur thu a sawi reng bawk.