Hun kal tawhah engineer-ten kawng tha leh tlo an siam thiam ta lo emaw tih tur khawpin sawrkar hruaituten an enkawl a, tunah erawh kawng tha tak tak an siam thiam a ni tih a takin kan hmu ta tih PWD minister Vanlalhlana chuan a sawi.
PWD minister hian Zirtawpni khan Bairabi leh Zamuang inkar kawnga lei, Teirei lui chunga dawh kai chu a hawng a. ZPM sawrkar hnu ah lei tha tak tak hawn a ni nual tawh a, mipui chhawr tangkai tur tlo leh rintlak a nih zel a beisei a, tha taka hna thawktu a enkawltu PWD hotute taimakna a fakawm, tiin a sawi.
“Kan ei ru loang, development tha takin kan thawk ang, tiin kan intiam a, kum hnih leh a chanve chhungin thil tam tak kan ti tawh. Mipui tan thil tha kan la rawn chhawp chhuak zel ang. Hun kal tawhah kan engineer-ten kawng tha leh tlo an siam thiam ta lo emaw tih tur khawpin sawrkar hruaituten an enkawl a. Tunah erawh kawng tha tak tak an siam thiam a ni tih a takin kan hmu leh ta,” a ti. AMC inthlana ZPM-in hnehna nasa tak a chan chhan pakhat pawh engineer-ten kawng tha taka an siam vang niin a sawi.
Report-a a lan danin, Teirei lei hi NABARD loan cheng nuai 1365.60 hmanga kum 2017-a bul tan a ni a. M/s Sadguru Engineers & Allied Services Pvt Ltd. in a thawk. Double lane build-up steel girder bridge a ni. Bairabi- Zamuang road hi Zamuang atanga pengin Bairabi luh hma km.3 velah NH-6 (spur) a pawh a. NH-6 hian Kolasib kaltlangin Bairabi leh Aizawl thlunzawmtu NH-6 a zawm ve leh chhawng a ni. Hachhek tlangdung chak lakna kawngpui pawimawh pakhat a ni tih sawi a ni.
Engineer-ten kawng tha an siam thiam tih kan hmu ta – PWD minister
