Euro 2024 final-a Spain an hneh loh hnuah Gareth Southgate chuan England manager hna a bansan thu a puang a, Three Lions boss thar ni thei tur awma sawirik rin zingah season liamta tawp ruala Liverpool boss nihna bansan ta Jurgen Klopp telin, German coach hian tunhnaiah England rama hnaruak chu luah a tum loh thu a sawichiang.
Kum 57 mi Klopp hian Anfield club kha Premier League, Champions League, FA Cup, League Cup pahnih, Fifa Club World Cup leh Uefa Super Cup lakpuiin, Reds head coach awm tawh zinga hlawhtling em em ni mah se a ban chhan a sawinaah chuan kum kaw chhung khan a thahrui a hmang zo tawh niin a sawi a, tunhnaiah hmachhawp em em pawh a nei lo tih a tarlang tel.
Germany ram khaw pakhat Wurzburg an tiha International Coaches’ Congress a chhim \umin Klopp hi chanchinbumite’n tunhnaiah dawhkan kilpui tura sawmtu a neih leh neih loh an zawt a, “Tun dinhmunah hna thar chungchanga inbiakna engmah sawi tur ka nei lo. Club lamin min be lo a, eng ram mah an lo lawr lo bawk.
“England a ni? A teh hian a hnai lo,” tiin a chhang!
Kum 2015-a Anfield club a enkawl hmaa kum sarih chhung Borussia Dortmund boss lo ni tawh Klopp hian tunah hna vawn lai nei ta rih lo mah se coaching-a kirleh lam a la sawibo lo a, “Tun dinhmunah eng thawm mah la awm rih lo mah se khawvela club \ha ber ber ka lo enkawl tawh a, thlate a han liam leh det ang a, inbiakna dawhkan kan kilho leh mai thei asin.
“Football behchhana hna thawh hi ka la duh a, ka tawnhriat hmanga midangte puih ka duh bawk a, ka tana belruat chu kan thlir ang,” a ti.
Klopp hi June ni 1 khan Wembley khelmualah a club hlui Borussia Dortmund guest nihnain a inlan a, Champions League final-a Real Madrid leh German club inkhel a thlir.
Liverpool chuan Klopp-a hmunruak luah turin Feyenoord boss Arne Slot an senglut fel tawh a ni.
Tunkar Thawhlehni khan England nena an hmehbel mek dang Newcastle United boss Eddie Howe pawh Japan-a Newcastle pre-season trip a hruaina hmunah zawhna chhangin Football Association lam nena inhnimhnaih tharna engmah an neih loh thu a sawi ve bawk.
Southgate chhuah hnua England game hmasaber tur chu September ni 7 Uefa Nations League-a Dublin khawpuia Republic of Ireland an luhkhung tur hi niin, he hunah hian manager an nei hman tawh tura ngaih a ni.
England Under-21s boss Lee Carsley bakah Chelsea leh Brighton manager hlui Graham Potter leh tunhnaia Bayern Munich-in an sengluh Thomas Tuchel-te pawh England hnaruak nen hian sawizawm an ni mek bawk.
England boss nih tum lo Klopp
