Nilai zan khan UEFA Champions League 2026-27 khelh chhunzawm a ni a, English club liante ngam loh Paris St-Germain chuan mikhual an nihna hmunah 4-2 ngawtin Manchester City an hneh. An mualah City an tlawm laiin English club dang Liverpool leh Aston Villa ten awlsam takin hnehna an chang ve thung. Nilai zana hnehna chang zingah Real Madrid pawh an tel.
City an tlawm
Pathianni zanah Liverppol 3-0 ngawta sawp thei Manchester City hian Etihad Stadium-ah champion lai PSG an mikhual. An mikhual lakah bul an tan chhe viau a, chawlhlawk hmain goal thum ngawt an chhuah hman. Haaland goal hnihin an inkar tizim bawk mah se City hian PSG an lehthal zo lova, an mualah ngei si hnih phurin a tlawm zui ta tho.
Etihad Stadium-a lenglut PSG an huangtau viau a, inkhel tan atanga minute 13-na lekah Désiré Doué chuan hmahruaina goal a thun nghal. Goal an thun vangin PSG an phur viau a, goal dang pawh an thun belh leh thuai bawk. Hmahruaina goal an thun atanga minute khat hnu lekah Ousmane Dembélé chuan an goal hnihna a thun belh zui leh zat. 2-0 a hma an hruai hnuah inrintawkna sang zawk nena inlan City tan hian Vitinha chuan minute 32-naah an goal thumna a thun belh zui leh cheu a, 3-0 ngawta hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, goal thum a luh belh leh. Second half tan tirh lam minute 53-naah Erling Haaland chuan goal thunin an si phurh a sut then. Haaland goal in an inkar tizim hret bawk mahse PSG tan Maghnes Akliouche chuan minute 62-naah an goal lina a thun belh zui leh a, an inkar an tizau nawn leh.
Si thum an phurh thar leh hnuin City in goal thun ngei tumin tan an khawh thar leh a, minute 75-naah Erling Haaland goal hmangin beiseina an nei thar leh. Haaland goal in fuih phur bawk mah se UCL a champion zawn mek PSG laka an si phurh an sut zo thei lova, an mualah 2-4 in an tlawm ta tho a ni.
Tunhnaia Champions League game-ah bik French Ligue 1 club lian PSG in English club lian an ngam hle. Season liam ta khan Chelsea leh Liverpool an hneh zawn hnuiin final-ah Arsenal an hneh zui leh. City sawptu PSG hian khelh hnih atanga point 6 hmuin table chung ber an luah.
Liverpool leh Villa an chak
Nilai zana inkhel dangah Liverpool leh Aston Villa ten awlsam takin hnehna an chang a, awlsam takin point thum an hmu ve ve.
Liverpool hian Mimualah LASK Linz an hmachhawn a, goal 9 ngawt luhna inkhel hmuhnawm takah 6-3 in hnehna an chang. Liverpool tan tan hian an defender thar Ronald Araújo chuan minute 22-naah hmahruaina goal a thun a. PSG atanga an lak luh Bradley Barcola chuan goal thum thunin hattrick a siam zui leh a. Anni pahnih bakah hian Jeremie Frimpongleh Lewis Koumas ten goal khat ve ve an thun bawk. Mualneitu LASK Linz tan Florian Flecker chuan goal hnih thunin, Robert Ljubicic chuan goal khat thun bawk mahse Liverpool lakah an tlawm zui ta tho a ni.
Mimualah awlsam taka Liverpool an chak rual hian Aston Villa chuan Villa Park-a an mikhual Fenerbahce chu 6-0 ngawtin an lo sawp ve bawk.
Aston Villa hian an mikhual Fenerbahce hi an ngam viau a, Johan Manzambi chuan inkhel tan atanga minute 12-na lekah hmahruaina goal a thun nghal. Hma taka goal an thun hnuin Villa tan hian Nicolas Jackson chuan goal hnih a thun a. Ross Barkley leh Tammy Abraham ten goal khat ve ve an thun belh leh bawk. An mualah awlsam taka an chak vangin Aston Villa hian khelh hnih atanga point 6 hmuin pathumnaah an inhlangkai.
Real Madrid in Roma an lehthal
Inkhel dangah UCL a champion ngun ber Real Madrid chuan AS Roma lakah si an phurh hmasak zet hnuin hnehna an chang let. Olimpico mualah 4-3 a hnehna changin Real Madrid hian pariatna an luah mek a ni.
English club liante ngam loh PSG
