Manchester United midfielder Bruno Fernandes chu English Premier League 2025-26 a player tha berah thlan a ni. United captain Fernandes-a’n chawimawina sang a dawn lai hian Manchester City rawlthar Nico O’Reilly chu rawlthar tha berah thlan a ni ve thung. EPL-ah London club Arsenal champion bawk mah se Manchester khaw club in mimal chawimawina an hui.
EPL 2025-26 a player tha bera thlan theih turin Manchester United player pawimawh Bruno Fernandes bakah Arsenal player pathum; David Raya, Gabriel leh Declan Rice, Manchester City player pahnih; Erling Haaland leh Antoine Semenyo, Brentford goal thun khawl Igor Thiago bakah Nottingham Forest player pawimawh Morgan Gibbs-White te chhawpchhuah an ni a. EPL a Arsenal champion puitu Declan Rice nen khaikhin an hlawh viau chungin EPL-a United pathumna nihpuitu Bruno Fernandes chu player tha berah thlan a ni. Fernandes hian Football Writers’ Association men’s Player of the Year chawimawina a lo dawng tawh bawk.
Manchester United talbuai rei viau mah se an captain Bruno Fernandes erawh mimal takin a khel tha em em reng tho. EPL season kal mekah United tan vawi 37 khel tawhin goal 8 a thun a, assist vawi 20 zet nei tawhin EPL-ah season khata assist ngah ber record siamtu Thiery Henry leh Kevin de Bruyne te record a tluk hial a. EPL season khata aassist nei ngah ber record thar siam thei dinhmunah a ding bawk. Trophy lak nei lo mah se pathumnaah United a hlangkai mai pawh hi thil ropui taka ngaih a ni a, Ferndes chetthat zar a ni.
Manchester United captain Bruno Fernandes-a’n mimal chawimawina ngaihhlut hlawh ber a dawn laiin Manchester City rawlthar Nico O’Reilly chu rawlthar tha berah thlan niin Premier League Young Player of the Season Award a dawng. He chawimawina dawng tur hian a elpui lian City tana a khelhpui Rayan Cherki, Bournemouth rawlthar pahnih; Junior Kroupi leh Alex Scott, Manchester United rawlthar Kobbie Mainoo, Newcastle full-back Lewis Hall, Brentford tana langsar Michael Kayode leh West Ham tana khel tha thei tak Matheus Fernandes te a khum.
Rawlthar tha bera thlan Nico O’Reilly hian Manchester City tan vawi 34 a khel a, defender ni chungin goal li a thun a, assist vawi thum ngawt a nei bawk.
English Premier League player tha ber Bruno Fernandes
