Entrepreneur-te Bana Kaih dan tur ruahman

Entrepreneur-te Bana Kaih dan tur ruahman
Planning & Programme Implementation hnuaia Mizoram Startup Mission leh Department for Promotion of Industry and Internal Trade (DPIIT) bultumin National Startup Day Mizoram Edition chu Nilaini khan Aizawlah lawm a ni a. Hmanpuitu chief minister Lalduhoma chuan Mizoram Bana Kaih Venture Capital Fund leh Startup Readiness Level of Mizoram a tlangzarh.
Chief minister chuan, kum tam tak chhung Mizoramah thiamthil leh ngaihtuahna tha tak tak nena sumdawnna bei awm tawh thin mah se, thlawpna leh puihna an hmuh that loh avangin an sumdawnna a thang thei loa, an suangtuahna a tak ramah a chang thei lo thin tih sawiin, “Entrepreneur-ten bultanna tur an mamawh ang sum an nei loa, kawng kawhhmuhtu tha an nei loa, sumdawnna lian leh hlawhtling din turin kawng zawh tur mumal an hre lo thin. Bana Kaih Venture Capital Fund hian chutianga harsatna chu a rawn sukiang dawn a ni,” a ti.
He fund hi sum thlawn pek emaw thawhlawm emaw a ni lo, tiin, rinna leh inrintawnna nena sum peipunna; entreprenuer hma hun eng tak nei leh thang zel tura theihna nei, eizawnna bultantute puitu tur, a bikin sumdawnna kalphung tha, thang thei tur leh danglam ngaihtuah chhuak thei, kutthemthiamna lam hawi leh industry dina thilsiam chhuak duh leh tunlai thiamnaa innghata eizawnna siam duh a tinzawn dawn tih a sawi a ni.
“Sum hian sumdawnna a thantir thei a, inrintawkna hian hma lam pan turin a pui thung. Chumi kawngah chuan Start Up Readiness Level (SRL) of Mizoram hi a pawimawh a. Record vawnna a ni mai loa, Mizorama entreprenuer-te leh eizawnna kawng danga hmalakna tur tarlangtu a ni,” Lalduhoma hian a ti.
SRL hmang hian, entreprenuer chuan official recognition a hmu thei dawn a, eizawnna bul tan tirte leh eizawnna tenau zawk beite chu investor, bank leh firm lian tan hmuh zung zung theih an ni anga, policy duangtuten data tharlam ber ber hmangin scheme tha leh rintlak zawk an duang thei anga, firm lian tak takten thil hrang hrang titute thil tih, an tihna hmun leh thlen chin chiang takin an hre thei bawk dawn tih sawiin, Mizorama sumdawnna hrang hrang chu langtlang, rintlak leh puih tlakin a siam dawn tih a sawi a ni.
“Investor leh firm lianten Mizoram hi hmun kilkhawr tak anga hmu loin, tih tur remchang tam em emna hmun a ni tih min hmuhsak se kan duh a. Kan thalaiten sumdawnna bultan hi thil theih leh career zahawm tak dinna a ni tih hria ila, heng programme kan duante hi tangkai, chhawrnaawm leh rah chhuah tha tak nei turin theihtawp chhuah ang u,” tiin chief minister hian a sawm a ni.
Mizoram Startup Mission CEO Lalrinzuala chuan Bana Kaih Venture Capital chungchang a sawifiah a. Target-ah cheng vaibelchhe 100 dah a ni a, sawrkarin Bana Kaih atangin vbch.20 a pe (tiam) a. A dang chu kawng dang atanga hmuh tum a ni. Pool fund a nih angin Security Exchane Board of India (SEBI) ah trust registration neih a ngai a, ‘Senhri Investment Fund’ tia register neih a ni. Operating partners tur company tha tak tak thawhpui a ni bawk. SEBI hnuaia register a nih angin, India ram ngaihtuah chunga kalpui a tul a, a tum bul ber erawh Mizoram entrepenuer-ten bul an tanna emaw hma an sawn zelna atana hma an lakna tur sum, dan ang thlapa tumpui a ni. DPIIT hnuaia registered startup-ten an dil thei a, chutiang registered startup chu Mizoramah 42 chauh an la awm avangin a dil thei neih tam a tul hle tih a sawi a ni.
Mizoram Outstanding Entrepreneurs & Startups Award 2026 sem a ni a, Mizoram Outstanding Entrepreneurs & Startups Award 2026 – Ecosystem Enabler lawmman Dr C Vanlalramsanga, IES hnenah hlan a ni.