Pathianni zan khan khawvela tualchhung league ropui ber English Premier League 2025-26 khelh zawh a ni ta a. Mizote en nasat ber EPL 2025-26 chu a her liam ta. EPL 2025-26 khar nia thil thleng langsar zual kan hrut kual ang.
Arsenal leh City inkar a zau
Champion tumin Arsenal leh Manchester City te an inum ngar ngar a, an inkar a zau lo thei hle. AFC Bournemouth lakah City an chak zawh loh vangin Arsenal nen an inkarah point li a tla zep a, City in an umphak theih tawh loh vangin kum 22 hnuah Arsenal an champion. EPL khar niah champion thar Arsenal an chak laiin Manchester City chu an mualah an tlawm ve thung a. Arsenal leh City te inkar hi a zau ta duai a, point sarih laiin an inthlau.
Champion thar Arsenal hian Conference League final khel mai tur Crystal Palace an hmachhawn. Champions League final khel zui mai tur Arsenal in an player Tha an awltir a, kum naupang zawk leh khel tlem zawkte khelhna hun an pe. An player Tha an khel chungin Gunners hian 2-1 in hnehna an chang tho thung.
Arsenal tan hian Gabriel Jesus chuan minute 42-naah hmahruaina goal a thun a. Second half Tan aTanga minute thumna lekah Noni Madueke chuan an goal hnihna a thun zui leh nghal zat a, an hmahruaina a tizau. Si hnih an phurh hnuin mualneitu Crystal Palace tan Jean-Philippe Mateta chuan hun tawp dawn hnaih minute 89-naah an goal neih chhun a thun.
Selhurts Park-a an len luh Tum hian Arsenal tan kum 16 leh ni 144 a upa Max Dowman chuan bul a Tan a, EPL a bul Tan thei naupang ber record a siam. Hmabak nei eng tak Dowman hian EPL a goal thun thei naupang ber record a lo siam tawh a. EPL a bul Tan thei naupang ber record a siam leh bakah EPL a champion thei naupang ber record thar a siam tel bawk a. EPL-ah lungthu kimin record duhawm tak a siam.
Champion Arsenal hian khelh 38 aTangin point 85 an hmu a, an khingpuite lakah goal 71 an thun laiin goal 27 chauh an chhuah.
Mimualah Arsenal an chak laiin Manchester City chu Etihad Stadium-a an mikhual Aston Villa hneh lovin an tlawm ve thung. City tan hian Antoine Semenyo chuan minute 23-na lekah hmahruaina goal thun mah se Aston Villa tan Ollie Watkins chuan goal hnih thunin an chhang let a, City lakah an chak ta diah a ni.
An mualah an tlawm Tum hian City in season tawp ruala chhuak tur captain Bernardo Silva leh defender John Stone te thlahna hun an hmang a. Inkhel a zawh hnuin manager ropui Pep Guardiola chu ui tak chungin an thlah liam zui nghal bawk.
Team Tha leh ropui zawka Manchester City dintu Pep Guardiola hian inelna hrang hrangah vawi 593 zet City a kaihruai hman a, kum 10 a enkawl chhungin trophy 20 zet a lakpui hman. Pep hian City hi EPL-ah vawi ruk a champion pui a, EPL-ah vawi li champion zawn thei hmasa ber a nihpui bakah EPL-ah season khata point 100 hmu thei hmasa ber an ni bawk. Tualchhung inelna hrang hranga hlawhtlinna a chanpui bakah an la champion ngai lohna Champions League, UEFA Super Cup leh Fifa Club World Cup-ahte a champion pui bawk.
Manager ropui Pep Guardiola hian season khat daih contract la nei bawk mah se City chhuahsan a thlang a. Kum khat vel bawr a awm hahdam hnuah National team enkawl a tum nia hriat a ni.
Spurs an him, West Ham an tla
EPL khar ni hian EPL khel zel turin London club lian Tottenham Hotspurs an him a, championship lamah West Ham United an tlahniam.
Him tuma inel mek Tottenham leh West Ham ten an mualah hnehna an chang ve ve. Tottenham in an mikhual Everton chu minute 42-naa João Palhinha goal thun hmangin an hneh a, him tura an mamawh point an hlawhchhuak.
Inkhel dangah West Ham United in an mikhual Leeds United chu 3-0 ngawtin hneh bawk mah se an chunga awm Tottenham an chak si vangin an him zo ta chuang lova, kum 14 hnuah championship lamah hreh tak chungin an tlahniam zui ta a ni.
Record thar siamtu Bruno Fernandes
Pathianni zan hian Manchester United chuan Mimuala an khingpui Brighton & Hove Albion chu 3-0 ngawtin an hneh. He inkhelah hian United captain Bruno Fernandes chuan assist vawi khat a nei a, EPL season khatah assist ngah ber record thar a siam.
EPL ah hian season khata Asssist ngah ber record chu Thiery Henry leh Kevin de Bruyne te siam assist vawi 20 a ni reng a. Hun rei tak hnuah Bruno Fernandes chuan season khatah assist vawi 21 neiin Henry leh De Bruyne te record arawn khum a, record thar a siam ta a ni.
United captain Bruno Fernandes hi EPL 2025-26 ah Player Tha bera thlan a ni a. Goal 27 thuntu Erling Haaland chuan a vawi thum nan Golden Boot a dawng a. Clean sheet vawi 19 zet nei Arsenal si nghal David Raya chuan a zawna a awi thum nan Golden Glove a dawng ve bawk.
Khai khawmna
EPL 2025-26 khelh zawh tak aTangin Arsenal, Manchester City, Manchetser United, Aston Villa leh Liverpool te champions league khel turin an tling a. AFC Bournemouth leh Sunderland ten Europa League an khel ang a, Brighton in Europa Conference League an khel ve thung ang. Hetihlai hian EPL aTangin Wolves, Burnley leh West Ham United te championship lamah an tlahniam ve thung.
Heng club pathumte hmunruak hi Coventry City, Ipswich Town leh Hull City ten season tharah an rawn luah ve thung ang.
EPL 2025-26 a herliam ta
