Inrinni zana English Premier League khelhah team lian pahnih; Arsenal leh Manchester United an chak loh laia hnehna chang Liverpool chu hmahruaitu thar an ni. Reds hian Selhurst Park-ah si an phurh hmasak zet hnuin hun tawp dawna Harvey Elliott goal thun hmangin hnehna hlu tak an chang.
Selhurst Park-ah mualneitu Crystal Palace leh an mikhual Liverpool te an inhnehtawk viau a, goal pawh a lut har hle. Chawlhlawk hmaa goal lut a awm theih loh zet hnuin minute 57-naah Palace Jean-Philippe Mateta chuan penalty atangin hmahruaina goal a thun. An mualah goal thun hmasa zawk an nih vangin Palace an phur viau a, an phur rei lo thung. Minute 75-naah yellow card a hmuh nawn vangin Jordan Ayew hnawhchhuah a ni.
Ayew hnawhchhuah a nih hnuin Eagles an buai zui a, goal an chhuah nghal thuai. Minute 76-naah Jones siamsak atangin Mohamed Salah chuan vanneihthlak ang reng takin goal a thun a, an si phurh a sut. Aigupta tlangval Salah hian Liverpool tan EPL-ah goal 150 a thun tling chiah a, EPL ah Reds tan goal 150 thun tling thei palina a ni. Salah hian Liverpool tan inelna hrang hrangah goal 200 a thun tling chiah bawk a. Reds tan goal 200 thun thei pangana niin Ian Rush, Roger Hunt, Gordon Hodgson leh Billy Liddell te hnung a zui.
1-1 a nih hnuin inkhel a hmuhnawm zui viau a, goal dang a luh belh lawk thei lo. Tam zawk ni chunga chak theihna hun tha an hloh dawn emaw tih hnuin Liverpool in chakna goal an thun ta nge nge. Minute 90+1-ah Harvey Elliott chua Salah siam tha tak chu near post-ah kawh zetin a pet goal a, chakna goal a thun. Elliott goal thun hnuin goal dang a luh belh thei tawh lova, Liverpool in harsa taka hnehna changin point thum hlu tak an hmu.
Mimualah si an phurh hmasak zet hnua hnehna chang let Liverpool hian khelh 16 atangin point 37 an hmu a, hmahruaitu Arsenal chu point khata lehpelin hmahruaitu thar an ni. An mualah uiawm taka tlawm Crystal Palace hian khelh 16 atanga point 16 hmuin 15-na an luah thung.
EPL hmahruaitu Liverpool
