Inrinni zan khan English Premier League khelh chhunzawm a ni a, Brighton hnehtu Liverpool chu hmahruaitu thar a ni. Liverpool an chak rualin Nottingham Forrest pawhin hnehna an chang a, pathumnaah an inhlangkai ve nawlh bawk.
Reds in Brighton an lehthal
Manager thar Arne Slot hnuaia khel tha tak Liverpool chuan an ni ang bawka season bul tan tha Brighton chu Anfield-ah an mikhual. Reds hian an mikhual Brighton lakah si an phur hmasa a, hun rei tak si an phurh hnuin hun tawp dawn hnaiah goal hnih an thun thei hram a, an mikhualte lehthalin 2-1 in an chak.
Khelh 9 atanga point 16 lai hmu tawh Brighton hian Liverpool lakah bul an tan tha viau a, goal pawh an thun thuai, Inkhel tan atanga minute 14-na lekah Ferdi Kadioglu chuan Dany Walbeck siamsak atangin hmahruaina goal a thun. Team lian lakah goal thun hmasa zawk an ni hian Brighton player te huaisenna a pe a, inringtawk takin Anfield-ah an inlan zui theih phah. Goal an thun hnu hian chawlhlawk hmain goal an thun belh leh teuh hle. Georginio Rutter pet tha zet mai chu Reds si nghak Caoimhin Kelleher chuan pui zetin a lo dang a, an hnufual thui lutuk tur lak ata an team a chhan him.
Chawlhlawk hmaa goal thun thei lo Liverpool hian chawlhlawk hnu lamah pawh goal an thun mai thei lo. Goal thun thei lo reng mah se an hnual lova, an buai hek lo. An thawhrim rah an seng a, hun tawp dawn hnaih lamah goal an thun ta nge nge. Minute 70-naah Cody Gakpo chuan Virgil van Dijk siamsak atangin goal a thun a, an si phurh a sut. Gakpo goal thun hian Reds a fuih phur leh zual a, goal pawh an thun belh leh thuai.
Hmahruaitu thar ni tura chak mamawh Liverpool hian chak ngei tumin an mikhualte an nawr a, an tan hun tha a inherchhuak ta nge nge. Gakpo goal thun atanga minute hnih hnu lekah Mohamed Salah chuan Curtis Jones siamsak atangin hma an hruai letna goal a thun. Inkhel hmuhnawm tak hi goal dang luh belh lovin a tawp a, Liverpool chuan 2-1 in Brighton an lehthal. Carabao Cup-ah Liverpool leh Brighton te hi an inhmachhawn tawh bawk a, Reds hian 3-2 in hnehna an chang. Ni li chhung lekin Liverpool hian Brighton lakah tum hnih hnehna an chang hman.
Brighton lehthaltu Liverpool hian EPL season kal mekah vawi 10 khelin point 25 an hmu a, table chung berah an awm. An hnuai chiaha awm Manchester City aiin point hnihin an sang zawk mek. Reds hian manager thar Arne Slot enkawl na hnuaiah vawi 15 khelin, vawi 13 hnehna an chang tawh a. Slot hi Liverpool manager thar zinga bul tan tha ber a ni a, hnuhma tha dang a hnutchhiah belh zel.
Pathumnaah Forrest
Season tharah Nottingham Forrest an khel tha hle a, 3-0 ngawta West Ham United an sawp hnuin Nottingham Forrest hian table-ah pathumna an luah der tawh. Pathumnaa inhlangkai Forrest hi Arseal aiin point khatin an sang zawk a, Chelsea aiin point hniha an san zawk bakah Manchester United aiin point riat ngawtin an sang zawk mek.
Season thara bul tan tha Nottingham Forrest tan hian inkhel tan atanga minute 14-naah Chris Wood chuan an mikhual West Ham United lakah hmahruaina goal a thun. Kum 32 mi Wood hian EPL season kal mekah goal 8 a thun tling der tawh a, goal thun tam lama tluk loh chu goal 11 thun tawh Erling Haaland chiah a ni rih. Wood hian Forrest tan EPL-ah goal 23 a thun tawh a, an club chanchinah EPL-a goal thun hnem pahnihna a ni mek a. A chunga awm mek Bryan Roy chu goal khat chiahin a tluk lo. Season bul tan tirh lam a la ni a, Wood hian Nottingham Forrest tan EPL a goal thun tam ber nih theihna hun tha tak a nei.
Wood goal thun hnu hian Callum Hudson-Odoi leh Ola Aina ten chawlh lawk hnu lamah goal an thun belh leh a, Nottingham Forrest hian an mikhual West Ham United chu 3-0 ngawtin an sawp zui ta a ni.
Season tharah rin phak baka Nottingham Forrest an chetthat a, pathumna hial an luah laiin London club West Ham United erawh chuan rin phak bakin bul an tan chhe ve thung. Hammers hian vawi 10 khel tawhin point 11 chauh an la hmu a, an manager Julen Lopetegui dinhmun a derthawng leh zual deuh deuh zel.
EPL hmahruaitu thar Liverpool
