Indian External Affairs Minister S. Jaishankar-a chuan Pathianni khan Belgium a thleng a, European Union member ram 27-a a thawhpuite nen an inbe dawn a, tun hi thla hmasa tawp atanga Israel leh US tang dunin Iran an beih hnua ram dang a tlawh hmasak ber a ni.
EU Foreign & Security Policy chief Kaja Kallas-i sawmna anga Brussels tlawhtu, Jaishankar-a hi EU Foreign Affairs Council meeting-ah a tel dawn tih external affairs ministry chuan a tar lang.
Ni hnih a cham chhungin Jaishankar-a hian EU hruaitute leh Belgium leh EU member ram danga a thawhpui a kawm dawn a ni.
January khan India-EU Summit neih a lo ni tawh a, hemi tum hian ram pahnihte hian free trade deal chungchanga inbiakna an kalpui chu an tifel a, India-in EU nena inpawhna a neih chu thuk zawk tawh tura ngaih a ni.
Brussels a pan hma hian Jaishankar-a hian United Arab Emirates leh Saudi Arabia-a a thiante a kawm hmasa a, West Asia-a buaina chhuak chungchanga thil thleng thar ber berte a sawipui.
Social media-ah Inrinni zan khan UAE Foreign Minister Sheikh Abdullah bin Zayed Al Nahyan nen an chhehvel thil thleng chungchangah ngaihdan an inhrilh tih a tar lang a. Post dang a siamah hemi zan vek hian Saudi Foreign Minister Faisal bin Farhan-a chu Asia khawthlanga buaina chhuak kaihhnawih a sawipui thu a tar lang bawk.
Asia khawthlng lam ram hruaitute hnena a biaknaah hian Indian sorkar chuan he biala cheng Indian maktaduai 10-te himna leh thatna a ngai pawimawh hle a. Saudi Arabia leh UAE-ah hian India mi maktaduai riat vel an cheng a ni.
EU ramte kawm turin Jaishankar-a’n Brussels thleng
