Ruahman lawk angin, kar liamta Zirtawpni zan khan Euro 2024 khelh tan niin, he thu buatsaih lai thleng hian match li chiah la khel mah se goal a lut hnem a, a vawikhatna atan rawlthar kum 16 miin European Championship a khel lai hmuh tur a awm bawk.
Game hmasa paliah tournament thlengtu Germany chuan 5-1 tehrenga Scotland sawpin, Hungary lakah 3-1-in Switzerland an chak a; Spain chuan sithum faia Croatia sawpin, champion lai Italy chuan si phur hmasa zet chungin Albania lakah 2-1 hnehna an chang hram.
A tir match hmasa pali-a goal 16 lut kha Euro 1976 hnu lamah European Championship leh World Cup thlengin match hmasa heti zata goal lut hnem ber a la ni.
Heti chin game thumah half time hmain goal thum a lut tling a, chutiang chu Euro 2020-ah khan a pumpuiin vawihnih chiah a thleng!
Euro-ah hian match 47 khelh tur niin, goal hi a lut hnem viau dawnte pawh a ni mahna!
Spain-in Croatia an hnehna inkhelah khan Barcelona rawlthar kum 16 leka upa Lamine Yamal chuan history thar siamin European Championship khel thei naupangber a ni.
En bik a hlawhna inkhelah goal khung nghal lo mah se ‘assist’ vawikhat neiin, Dani Carvajal-a thun kha a siamsak a ni.
Chawhruala kum 26 leh ni 287-a upa luhtirtu Italy khan kum 1988 hnu lama an Euro starting line-up naupangber an chakpui hram a ni.
Hungary game-ah khan kum 23 leh ni 234-a upa Liverpool midfielder Dominik Szoboszlai kha Euro-a captain naupang ber a ni.
Qualifying khelh laia group winner zinga goal khung tlem ber Albania khan tournament tan hnuah goal an khung awlsam hle thung a, tan atanga second 23-na lekah Italy goalkeeper Gianluigi Donnarumma pelin hmahruaina goal an tilut a, major tournament-a an goal hnihna leh Euro history-a goal lut rang ber a ni nghal.
A hmaa Euro goal rang ber chu Euro 2004 daih tawha second 67-na leka Russia tan Greece laka Dmitri Kirichenko thun kha a ni.
Euro 2024 tannaah record thar inlar nghal \hawt
