Zirtawp zan leh Inrinni zan khan Euro 2024 khel tur zawnna neih chhunzawm a ni a. Zirtawp zan leh Inrinni zana an khingpui lakah hnehna chang France, Belgium leh Portugal te inelna lian hmachhawn turin an tling. Inrinni zana hnehna chang Italy pawhin England an hnaih leh zual a, phur zawkin hma lam an pan.
France chakpuitu Mbappe
Group B hmahruaitu France chuan zirtawp zan khan khingpui hautak Netherlands an hmachhawn a, Mimualah Kylian Mbappe goal hnih thun hmanga hnehna changin an tum ram an thleng a, Euro 2024 khel turin an tling.
Johan Cruijff Arena, Amsterdam,-a lenglut France hian bul an tan tha hle a, inkhel tan atanga minute sarihna lekah goal an thun nghal. Minute sarihnaah hian captain Kylian Mbappe chuan Clauss siamsak tha tak chu goal-ah a chantir a, hmahruaina goal a thun. Hma takah goal thun mah se chawlhlawk hmain goal an thun belh thei lova, si khat faia hmahruai chungin chawlhlawk an hmang.
Chawlhlawk hnu lamah France an khel tha chhunzawm a, goal an thun leh thuai. Minute 73-na lekah Rabiot siamsak atangin Mbappe chuan an goal hnihna a thun. Si hnih faiin hun rei tak chhung hma an hruai a, an game a nghet tha tawk viau bawk a, Netherlands lakah chak ngei tura ngaih an ni. Hun rei tak chhung si hnih an phurh hnuin hun tawp dawn hnaih minute 83-naah Quilindschy Hartman chuan goal thunin an si phurh a sut then. Hartman goal thun hmangin tlawm pumpelh beiseina thar nei bawk mah se Netherlands hian goal an thun belh thei lova, an mualah tlawmin, hma an sawn thei rih lo.
An elpui lian Netherlands lakah an chak leh tak vangin France hian khelh thum atangin point 18 an hmu a, Group B-ah point rukin an sang fal. France hnuaiah hian khelh ruk atanga point 12 hmu Greece an awm a. Netherlands hian khelh nga atangin point 9 an hmu a, pathumnaah an awm mek.
Zirtawp zan vek khan Greece chuan si hnih faiin Republic of Ireland chu si hnih faiin an hneh a, pahnihnaah an insawh nghet. An mualah ngei Greece hneh lova an tlawm vangin Republic of Ireland in Euroe 2024 khelh an beiseina tih tawp a ni ta thung.
Belgium in an tum ram an thleng
Zirtawp zan khan Group F hmahruaitu nih inchuhin Austria leh Belgium an inkhel a. Ernst-Happel-Stadion-a inkhel hmuhnawm takah mikhual team Belgium in 3-2 in hnehna an chang a, Euro 2024 khel turin an tling chiang nghal.
Belgium leh Austria te hi point 13 ve ve hmu mek an nih vangin an inkhel tur hian ngaihven a hlawh a, mualneitu Austria hian hnehna changin, inelna hmachhawn turin tlin nghal an tum hle. An mualah khel chhe lem lo viau mah se goal an chhuah hma an tuar a, uiawm takin an tlawm. Belgium lakah tlawm mah se Euro 2024 hmachhawn turin tlina hun tha an la nei tho thung.
Belgium hian mualneitu Austria lakah tha takin bul an tan a, inkhel tan atanga minute 12-na lekah Dodi Lukébakio chuan hmahruaina goal a thun nghal. Hma taka goal an thun hnuin goal lut a awm belh thei lo vang vang a, minute 55-naah hmahruaina goal thuntu Dodi Lukébakio chuan an goal hnihna a thun belh a. Si hnih faia hma an hruai hnu lawkah Romelu Lukaku chuan an goal thumna a thun zui ve leh zat a, si thum faiin hma an hruai ta. Si thum fai ngawta hma an hruai vangin Belgium an thlamuang tan tawh a, an thlamuang sual teuh hle. Hun tawp dawn hnaihah goal hnih an chhuah bakah tlem zawk an nih bawk vangin an dinhmun a derthawng hman hle.
Hun tawp dawn hnaih minute 72-naah Konrad Laimer chuan goal thunin an si phurh a sut. An si phurh an sut then hnu lawk minute 78-naah Netherlands player Amadou Onana hnawhchhuah a ni a, Australia an phur leh zual. Tam zawk an nih hnu lawkah Marcel Sabitzer chuan penalty atangin an goal hnihna a thun zui leh. Goal hnih an thun bakah tam zawk an nih vangin Austria an phur a, na takin an mikhualte an nawr zui nghal. An mikhual nawr nasa viau mah se goal dang an thun belh thei lova, an mualah uiawm takin an tlawm ta a ni.
Group F-ah Belgium hian khelh ruk atanga point 16 hmuin hmahruaitu an ni a, Euro 2024 khel turin an tling chiang nghal bawk. Belgium laka tlawm Austria khan khelh ruk atanga point 13 hmuin pahnihna an ni a. Austria hi pathumna Sweden aiin point 7 zetin an sang zawk mek a ni. Austria hian Azerbaijan an hneh a nih chuan Euro 2024 khel turin an tling zui ve leh ang.
Ronaldo a la tar lo
Zirtawp zan khan Group J hmahruaitu Portugal chuan an group a pahnihna Slovakia an mikhual a, an mualah 3-2 a hnehna changin Euro 2024 khel turin an tling chiang nghal. Slovakia an hneh tum hian Cristiano Ronaldo chuan goal hnih a thun a, ram tana goal thun hnem ber a nihna tizau leh zualin, Ronaldo hian a la tar lohzia goal hmangin a lantir.
Portugal hian an mikhual lakah an khel tha viau a, minute 18-naah Goncalo Ramos chuan hmahruaina goal a thun. Ramos goal thun hnu hian Cristiano Ronaldo chuan minute 29-naah penalty a pet goal a, an goal hnihna a thunn a, si hnih faia hmahruai chungin chawlhlawk an hmang.
Chawlhlawk hnu lamah Slovakia in goal an thun hmasa ve thung a, minute 69-naah David Hancko chuan goal thunin an si phurh a sut then. Goal an chhuah hnu lawkah Portugal in goal an thun zui leh thuai a, minute 72-naah Ronaldo chuan an goal thumna thunin, an hmahruaina a ni zau nawn leh. Ronaldo hian Portugal tan vawi 202 khelin, goal 125 zet a thun tawh. Si hnihin hnufual zui leh mah se Slovakia an beidawng duh chuang lo va, minute 80-naah Stanislav Lobotka chuan an goal hnihna a thun zui ve leh a. Goal dang an thun belh theih tak loh vangin Portugal laka point hlawhchhuah an tumna an puitlin zo lo.
Group J-ah hian Portugal hian point 21 hmuin hma an hruai fal a. Slovakia leh Luxembourg ten pahnihna an inchuh zui ve leh ang.
Euro 2024 khel turin ram pali an tling chiang ta a, chungte chu inelna thleng tur Germany bakah France, Belgium leh Portugal te an ni.
Italy in hma lam an pan
Inrinni zan khan Italy chuan an mikhual Malta chu si li faiin an hneh a, Euro 2024 khelh phak an tumnaah hma lam an pan zel
Champion lai Italy hian San Nicola-a an mikhual Malta lakah an khel tha viau a, Domenico Berardi goal hnih leh Giacomo Bonaventura leh Davide Frattesi te goal thun hmangin hnehna an chang a, awlsam takin point thum an hmu. Point thum an hmuh leh tak vangin Italy hian khelh 5 atangin point 10 an hmu mek a. An chungchiaha awm England chu point thumin an la phak lo. England nen hian Thawhleh zan hian an inkhel zui leh dawn a, England lakah chakin, pahnihnaah insawh ngheh lehzual an tum ang.
Euro khel tur France, Belgium leh Portugal
