Excise & Narcotics-in jubilee lawm

Excise & Narcotics-in jubilee lawm
Excise & Narcotics Department chuan Thawhtanni atang khan an kum 50 tlin, Golden Jubilee an lawm tan.
Jubilee hawnna hmanpuitu Excise & Narcotics minister Lalnghinglova Hmar chuan, an department chu miin an phurpui a, an beisei phak bakin mipuiin an thlawp a. Sawrkar hotute pawhin an duhsak a,kan thawhhona a tha tih a lanna a ni, tiin a sawi.
“Kan jubilee kum hi kan inngaihdam a, thawhhona tha lehzual a awm theihnana kan insiamthatna hun tur a ni. Zalenna kum a nih angin mi tupawhin, bawih tanna eng ang pawh a lo nei a nih pawhin, he jubilee hi min chhuah zalentu nise, hneha zalen tura kan rilru kan siamna ni rawh se,” a ti.
An department hna bul ber chu ruihhlo do a nih avangin, an do lamah an tan a thiang lo, tiin, jubilee kum a nih anga heti lama tang thar turin department mite a fuih bawk.
Excise & Narcotics Department hi 1976 March 15 khan bul tan a ni a, a tirah chuan Excise & Taxation Department tih a ni. Hun kal zelah Excise department tiha kalpui a nih hnuah kum 1996 khan Excise & Narcotics Department tia kalpui a ni.
Golden Jubilee lawmnaah hian Thawhtanni tlai khan Commissioner of Excise hoin ‘Golden Jubilee Mei Det programme’ hman a ni a. March 18-ah Aizawl leh district dangah Golden Jubilee puala thisen pek runpui neih a ni ang. March 19-ah department thawktu hluite nen ‘A Day with Pensioner’ hman a ni anga, March 20 chawhnu ah jubilee kharna hman a ni ang.