F1 fastest lap bonus point paih dawn!
Car intlansiak level sang ber Formula One race (grand prix)-ah hian thlen hmasak dan indawta point pek dan kalphung pangngai bakah tlankawng vawikhat kual chhuahna’na hun hmang rei lo berin fastest lap bonus point khat an hlawhchhuak thin a, he tihphung hi kum 2025 season atangin an paih dawn tih Formula 1 thuchhuahin a tarlang.
Motorsports thuneitu sangber FIA lamin he thutlukna a siam chhan pakhat chu kumin intlansiak hnuhnungber Singapore race-a RB driver Daniel Ricciardo-a’n fastest lap changtu leh title contender ni bawk Lando Norris kut atanga bonus point khat a chhuhsak vang kha a ni.
Dan ding laiah bonus point chang tur chuan intlansiaka top 10 chin luah phak a ngai a, lap khat tlan rei lo ber McLaren driver Norris kha Singapore race-ah 18-na a nih daih si avangin extra point khat chu a chang zo ta lo a, a dawta lap khat tlanchhuak rang ber Ricciardo kutah bonus point a lut ta zawk a ni.
RB kha Red Bull team pakhat zawk (sister outfit) an ni a, Red Bull driver Max Verstappen chu championship kal laia McLaren star Norris nena title inchuh mek an nih bawk si avangin bonus point kalphung hian sawi neuh neuh a titam a, chu vang chu nge ni dawn FIA lamin nakkum atanga paih an rel tlu ta mai a, dan dinglai an tihdanglam chhan erawh an tarlang lo.
Verstappen hi Briton Norris chuan a rawn tihthaih na sawt hle tawh a, drivers’ championship standing-a Briton leh Dutchman inthlauhna hi point 52 chauh a ni tawh.
Kartawp United States Grand Prix behchhana drivers’ press conference a hmachhawn tumin fastest lap ken tel bonus point khat paih a nih tur chungchang hi Norris chuan sawichhuakin, eng vanga paih tur nge an nih a hriat loh thu leh a nih ang hian kal chhunzawm se a duh tih a sawi a, Singapore thil thleng avang maia kalphung thlakdanglam hi tul ka ti lo,” a tichhuak.
Tarlan tak angin, kum 2019 atanga an hman tan fastest lap bonus point paih leh an tum chhan hi FIA chuan he thu buatsaih lai thleng hian khawvel hriatah an la puangzar lo.
F1 fastest lap bonus point paih dawn!
