Mizoram puma Swachhata Hi Seva 2024 Campaign kalpui dan turah chief secretary Dr Renu Sharma kaihhruaiin Ningani khan inbiak hmuhtheihna hmanga sawi ho a ni a. District tin bawrhsap-ten an awmhmun atangin an chhim. Sawrkar laipuia Ministry of Housing and Urban Affairs-in he campaign hman dan tur ruahmanna a siam angin September 14 atanga October 1 thleng kalpui tur a ni.
Chief secretary hian sawrkar laipuiin tun tum Swachhata Hi Seva hmalakna atana kaihhruaina a siam leh Steering Committee thurel leh bawhzui dan tur a sawifiah a. Kumin SHS campaign-ah hian ‘Black Spot’ tih an phuah, Cleanliness Target Units (CTUs) – hnawmhnawk inchhekkhawm, khawtlangin rei tak a lo ngaihthah tawh, environment leh mipui hriselna atan pawha pawi thei tur awm angte zawnchhuaha thenfai chu hna pui ber tur pakhat a ni dawn tih a sawi a ni.
UD&PA secretary Lalmalsawma Pachuau chuan September 14-a state huapa khuhhawn dan tur a sawi a. PHE secretary Er F Liantluanga’n thingtlang (rural area) huamchhunga SHS hmalakna kalpui dan tur sawifiahin, UD&PA director Dr Andrew H Vanlaldika’n khawpui (urban area) huamchhunga hmalak dan tur a sawifiah bawk.
District level-a hmalakna tur zingah, thenfai hnatlang bakah health camp buatsaih, quiz/ essay competition, college-te nen thawk hoa hma lak leh awareness programme hrang hrang kalpuite a tel. Kumin Swachhata Hi Seva-ah hian thupui chu “Swabhav Swachhata, Sanskaar Swachhata” tih niin, faina leh thianghlimna chu nunphung pangngaia neih tura inzirtir chu ngaihpawimawh a ni.
Fai beihpui thlak dan tur sawi ho
