Swachh Survekshan 2023 hnuaia India ram puma faina inelna zonal hrang hrang pangaa neihah Lunglei chuan Zonal Clean City Award (Northeast) dawng in, Aizawl pawhin Clean City Award a dawng a. India ram khawpui 4477 zinga hetiang award dawng phaa kan awm hi a ropui tih loh rual a ni lo a, a lawmawm hle.
He award a ropuina leh a lawmawmna em em chu, monitoring team te hi Third Party an ni a, faina an endik dan hi state official-te pawhin an hriatpui lo va, an hmuhpui lo va, faina endik turin engtikah nge an lo kal a, eng criteria nge an hman tih pawh hriatpui theih a ni lo; a fair thawkhat viau ang tih a rinawm.
India ram hi Zonal panga (North, East, Northeast, South leh West) -ah te then a ni a. Zone tinah award pali siam niin, Zonal Clean City Awards bikah hian award 20 a awm tihna a ni a, chung zinga pakhat dawngtu chu Lunglei khawpui hi a ni. Khawpui mihring tam dan azira then hran thliah thliah a ni a, Lunglei hian, mihring nuaikhat hnuai (50,000-1,00,000) zingah award hi a dawng ta a ni. He event-ah hian a vaiin category 110-ah award siam niin, Aizawl pawhin chung zingah chuan Clean City Award hi a dawng ve bawk a ni.
Tunhma pawhin India ram pum huapa inelnaah Mizoram hian fai award hi a lo dawng nual tawh a, faina lamah hian hma kan sawn hle tihna a ni.
Hetih lai hian, fai award meuh dawng si, kan lui dungte a bawlhhlawh em em a, kan kawmkar te a tawp em em kan ti rilru a ni maithei. Tuna award an pekchhuahte hi chu khawpui area a ni mai a, fai vak lova kan lo inhria a nih pawhin, keini aia fai lo an lo tam ve lehchhawng zel tihna te pawh a ni thei awm e.
Eng pawh ni se, faina lamah hian hma kan sawn rualin, hmasawnna tur erawh a la zauvin a la tam em em a, award dawn avanga hawi sâng nghal ngawt thei kan ni lo tih kan inhriat reng a pawimawh awm e.
Faina lama hmasawnna…
