Mizoram Home department chuan police 350 leh Home Guard 94 a la dawn a, fair taka lak a ni anga, insawipui a tangkai vak dawn lo tih Home minister K Sapdanga chuan a sawi.Thawhtannia ZPM party office-a inkhawmah K Sapdanga chuan, sawrkarin Home department a phalsak angin police tiang keng chi 150 leh silai keng chi 200, a vaiin 350 lak an tum a. Nikumah fair takin an la a, a fair leh hle dawn tih a sawi. Physical efficiency test, written exam leh interview a awm anga, heng inelna chi thum hi mark puttir vek tum a ni tih a sawi bawk.
“Silai pu tura Saptawng thiam kawngro suttir lutuk kha a awm tawh lo ang. Sawrkar thupek angin exam zawhna chu MPSC-in siamin a endik leh ang. Nikuma lak 259 kha an kawng kal dan atang ringawt pawhin an training tha tih a lang a. Training chhungin ruihtheihthila buai an awm lo. Mizoram Police hi fitness-ah leh discipline-ah tan kan la zual zel ang,” a ti.
Mizoram Home Guard lak turin advertisement tih chhuah a ni tawh a, hmeichhe quota a khah tawh avangin mipa tan chauh a ni rih dawn tih Home minister hian a sawi a. Matric pass chin, mi chak, discipline tha, mi 94 fair takin lak an tum tih sawiin, “Physical efficiency test leh interview a awm anga, mark a pu ve ve ang. Duhsak zawng nei chuan exercise lak lamah lo tanpui tur. Pressure vang ngawt chuan tlin a harsa ang, insawipui a tangkai vak loang,” a ti.
Danin a sawi angin, MRHG hi kum thum atan lak a ni anga, an hun pawhsei/ tihtawp theih a ni tih a sawi. A tul huna ral do thei, VIP guard, bank or house guard, tui tla chhar leh kang thelh ti thei tur mi chak tha an duh tih a sawi a. MRHG train chhuak chu sawrkar/ private-ah multi-tasking staff atan an rintlak dawn tih a sawi a ni.
UD&PA minister ni bawk K Sapdanga chuan, ‘Mission Urban Drain’ kalpui turah MLA bial tin huamin hmun 44-ah hna thawh tum a ni tih a sawi a. Leimin mual tawlh laka khawpui chhanna atan cheng vaibelchhe 35 neiin bul an tan mek a, Aizawl khawpuiah hma la hmasa in, district khawpui dang pawh tuam zel tum a ni tih a sawi.
Drain lian cover inkalpawhna atan Aizawl MLA-te leh corporator-te tuiluankawr siamna atan an local development fund hmang uar turin an ngen tih a sawi a. An bial leimin laka veng turin, an mi duhsakte tho thawhtirin drain lo siam se, tia an ngen thu sawiin, “Kum 2033-ah zawh vek kan beisei. Khawpui himna atan 2028-ah ZPM a sawrkar leh a ngai,” a ti.
Mission Urban Drain hmalakna atana
UD&PA minister thusawi:
8 Aizawla an tinzawn langsar zingah, Zuangtui mual che – 132 Sub Station -biak in- sikul- thlanmual; Zuangtui- Thuampui inkar lei che kumhlun; Supply kudam kawng; Sihpui ruam lei che reh thei lo; Armed Veng, Venghlui Dak In kawmthlang mual khi, Hlimen chhehvel leh thlanmual tawlh hrang hrang a tel.
8 Project inthuah a awm lohna turin Aizawl khawpui drain map an siam a, storm drain siam dan chuan quality hran neiin fet taka ven a ni.
8 Tuidawn leh tui chhia zawng zawng drain te atangin a laihawlah, chuta tangin drain puiah a luang anga, a theih chin chinah tuiluankawr chung khuhin, lirthei tlan theiha siam kan tum ang. Lirthei ke pali nei tlan theih lohnaah ke pahnih nei tal. Lirthei tlan theih lohnaah step siam tum a ni ang. Hetianga tuiluankawr tha tak siam hi khawpui himna tur leh faina tura duan a ni.
Fair takin police 350 kan la dawn Insawipui a tangkai vak dawn lo: – Home minister
