Family pension-ah eirukna nasa Hma lakpui turin kohhran ngen

Family pension-ah eirukna nasa
Hma lakpui turin kohhran ngen
Family pension pekchhuaha Mizoram sawrkar sum sen a sang hle a, pension lak danah eirukna nasa tak a awm tih thawktute chuan an sawi.
Dan dik loa family pension la te sawrkarin ‘surrender’ tura a ngen meknaah Aizawl District Treasury hotute chuan August 14 khan kohhran hruaitute nen inrawnkhawm a buatsaih a. Kohhran hrang hrang headquarters 34 atangin aiawh mi pahnih theuh an tel.
Accounts & Treasuries hotute sawi danin, an hnena pension dilte dilna lut an zirchianna atangin dan dik loa lak a tam hle a, family pension lak theih dana pawm loh, nupui/ pasal dang neih hnua lak zawm theih tawh loh chu bawhchhia an tam hle a, hrereng chunga la an awm laiin, hre lo tak tak chunga lo lak zawm pawh an awm.
Family pension lak duh avanga mahni nu emaw pa emaw nupui pasal emaw thih ni tidanglam leh, inthen ni tidanglama Death certificate thar siam leh, thih hnua tidanglam duh pawh an awm tih an sawi a ni.
Innei lai reng, inthen tawh anga certificate siamtir, innei reng reng lo innei anga marriage certificate lo siamtir, ration card dik lo siam leh document dang a dik loa siama family pension la thin leh lak tum pawh an awm tih an sawi a. Danin a phalsak, an fahrin emaw fa lak emaw ni lo, chuti anga lo insawia la leh lak tum an manchhuah an awm bawk tih an sawi a ni.
Heng neihna atana tul leh mamawh – kohhran lehkha, village council/ local council lehkha, YMA branch lehkha nei thei an awm thin tih sawiin, a bikin kohhran lehkha siamsak leh pekchhuah kawngah kohhran hruaitute chu thawhpui turin an sawm a. Mi khawngaihna avang emaw inhmelhriat that vang emawa inhriatthiamna nena an lo pekchhuah a nih pawhin, dan bawhchhiatna a nih tho avangin fimkhur pui turin an ngen tih A&T hotute hian an sawi.
Mizoram sawrkarin dan dik loa family pension laten surrender tura a ngen meknaah, kumin September 30 thleng hian hun a hawng a. Mipuia an puanchhuah atangin, mahni inthiamloa rawn pe kir an awm nual tawh tih sawiin, dan dikloa la si, surrender duh lote chu hun tiam a ral hnu hi chuan an zawngchhuak dawn tih an sawi.
A&T Local Fund Audit & Pension director Malsawmdawngliani chuan, surrender duh lo hi an tan zawnchhuah a harsa loa, ‘Pension Police’ tia an sawi mai, Task Force-in district tinah hetiang mi hi an zawngchhuak dawn a, chutih hunah chuan insawipuiin awmzia a nei dawn loa, court lamah dan hmangin BNS emaw BNSS hnuaiah thubuai rip tak siam a ni anga, sum chawi leh jail tan thlengin dan hnuaiah hremna lekkawh a ni dawn tih a sawi a ni.
CCS (Pension) Rules 1972 hnuaia family pension la thei lote:
8 Family pension la mekin nupui/pasal a neih leh chuan a la thei tawh lo
8 Sawrkar hnathawk fa hrin ni lo emaw dan ang taka fa lak ni lo, birth certificate lem siama la
8 Sawrkar hnathawk ni reng si, mahni nu emaw pa emaw fate emaw family pension la
8 Pensioner ni reng si, mahni nu emaw pa emaw fate family pension la
8 Pasal nei reng chung si, pasal neilo anga inziah a, nu/pa emaw pasal a sun takte family pension la
8 Family pension lak duh avanga mahni nu leh pa thih ni emaw pasal thih ni/ inthen ni ti danglama la
8 Thla khata sum lakluh zawng zawng belhkhawma monthly minimum pension @ Rs. 8700 plus DR income nei pha, tun dinhmunah Rs. 12702 la tling