FCRA chungchangah inrawnkhawm FCRA siamthat tumna doin Black Day

Foreign Contribution (Regulation) Act tihdanglam tuma Parliament-a Bill putluh tum chungchangah Thawhlehni khan India ram pum huapin political party bakah Kristian/ kohhran aiawhten inrawnkhawm an huaihawt a. Mizoramah pawh Congress party chuan FCRA dan tihdanglam tumna duhloin ‘Black Day’ an hmang.Joint Action Forum on Minorities (JAFM) huaihawtin FCRA chungchangah ram pum huap inrawnkhawmna ‘National Consultation on the Proposed Foreign Contribution (Regulation) Amendment Bill 2026’ chu Delhi-ah neih a ni a. JAFM chairman, DMK MP ni bawk P Wilson chuan kaihruaiin, National Conference party president Dr Farooq Abdullah, DMK party hotu, MP Kanimozhi Karunanidhi, AAP MP Sanjay Singh, Meghalaya atangin Congress MP Saleng A Sangma, DMK MP A Raja bakah Lok Sabha leh Rajya Sabha MP 20 rual an tel.
Kohhran aiawhte pawh inrawnkhawmah hian an tel a. CNI (Delhi Diocese) Bishop Rt. Rev. Paul Swarup, Mar Thoma Syrian Church Bishop Mar Aprem, Catholic Bishop’s Conference of India atangin Father Christu Rajamony, United Christian Forum president Michael Williams; India hmarchhak kohhran aiawhin NEICC general secretary Rev. Meyu Changkiri leh CBCNEI secretary general Namseng R Marak; National Council of Churches in India general secretary Rev. Asir Ebenezer leh All India Sunday School Association president Rochamliana te an tel bawk.
Inrawnkhawmnaah hian mi hrang hrangin thu an sawi a. Sawrkarin FCRA kalphung tihdanglam a tum dan chu hawi lam nei sa ran, tum bik nei sa, a tir atanga engkim ruahman a nih avangin India ram tan kawng hrang hrangah harsatna leh thuanawpna nasa tak thlentu a ni dawn tih sawi a ni a. FCRA dan tihdanglam tuar hmasatu turte chu tihdam hna thawk tute, zirna in hrang hrang, tlawmngai pawl, hmasawnna hna hrang hrang thawktu, hnuchham chawmna in, phar enkawlna hmun, thingtlanga lo neih tih hmasawn hna thawktute, mirethei leh chhuanchham zawk tana thawktu pawl leh kohhran hrang hrang an ni dawn tih sawi niin, dan tihdanglam tum hi India tan vanduaina a ni dawn tih an sawi a ni.
Zawi zawia hnam tenau zawk leh sakhaw tenau zawkte chimral chu BJP sawrkar thiltum ber a nih zia a lang tawlh tawlh a, chumi atana an hmanraw tangkai leh hlauhawm ber tur chu FCRA dan hi a ni, tia sawi a ni a. Nasa lehzuala tawngtai a tul tih an sawi a ni.
Thawhlehni khan Mizoram Pradesh Congress Committee chuan central-a BJP kaihhruai sawrkarin Parliament Session-a FCRA Amendment Bill pass tura a phochuah duhlohna leh dodalna Black Day an hmang.
MPCC senior vice president Lalnunmawia Chuaungo chuan, FCRA hi kum 2010 khan central-ah Congress kaihhruai sawrkar laiin siamthat a ni tawh a. Kum 2016, 2018, 2020 ah rules hmangin khawih danglam zeuh zeuh a ni a. Kumin March khan FCRA Bill hi pharh tum ni mah se, Congress party leh civil society-ten an sawisel nasat avangin chhawpchhuah a ni ta loa, tunah chhawpchhuah a ni leh tih a sawi.
“FCRA Bill 2026 do a tul chhan chu, dan thar pass an tumah hian a vai ni loin a then chauh siamthat a ni a. Foreign contribution dawng tur hian certificate a ngai a, dan tharah chuan certificate an hnawl a, an hnawl chhan sawifiah a ni lo. Tu emaw in FCRA dil mah se, hnawl tawp theih a ni a, an hnawl tawh chuan appeal-na tur a awm dawn lo,” a ti.
FCRA portal-a a lan danin, kumin July 15 thleng khan foreign contribution dawng thei 14449 zingah 22498 chu cancel an ni tawh a, 15212 dang chu a certificate dam chhung a pel (expire) tawha ngaih a ni tih sawiin, “Hei hian a nghawng chu, Mizorama kan kohhran hrang hrang, charity atana inhmang, hnuchham enkawlna, rualbanlote tana inhmangten harsatna an tawk mek a. He dan an pass hnuah phei chuan ‘a zual zapui vaihlenhlo’ a ni dawn a ni,” a ti.
He dan hnuaia ram dang tanpuina hmanga asset (building leh khawl) lei tawhte chu sawrkarin a duh chuan a chhuhsak tawp thei niin MPCC hruaitu hian a sawi. “Entirnana atan, Synod Hospital Durtlangah foreign atangin damdawi in sakna kan lo dawng tawh a nih chuan, FCRA kaltlanga tanpuina an hmuhna certificate kha a lo tawp (expire) a, renew an phalsak lo emaw a nih chuan, designated authority an ruat khan Synod Hospital khi an la tawp thei dawn. Heng bakah hian thil hrang hrangah ruihhlo ngai enkawlna, hnuchham enkawlna pawh an chhuhsak hmak hmak thei dawn,” a ti.
Mizoram chief minister chu kohhran hruaitute, NGO hruaitute, political party tin hruaitute hruaiin Prime minister hmuhpui turin an ngen tih a sawi a. Mizoram Legislative Assembly ah Special Assembly koin, FCRA duh lohna official resolution siam tura an ngen bakah Lok Sabha-a he bill putluh an sawiho hunah a ep zawngin Mizoram MP chu thu sawi ve ngei turin an ngen tih a sawi bawk.
He bill hi sawiho a niha pass a nih pawhin, Congress party chuan an do chhunzawm zel dawn tih Lalnunmawia Chuaungo hian a sawi a. Black Day hmangtu kalkhawmte hian hemi kaihhnawihah hian resolution an pass a ni.