Federation Enclave sak mek hawng
Federation of Mizoram Goverment Employees & Workers (FMGE&W) bultuma Ainawn Venga sak mek, Federation Enclave Sample Flat leh Community Centre chu Nilaini khan chief minister Lalduhoma’n a hawng.
Chief minister chuan Aizawl a tawtin inkalpawhna leh vantlang hmuhma thar siam tura thil tih a harsa tawh a. FMGE&W leh Blue Mountain Co hmalak ang hian, Aizawl chhehvela inhmun neitute leh developer tanghoin housing complex tha tak tak, mipui lei phak tur ni si din nual thei se, Aizawl hmel chu nasa takin a danglamin kan changkanpui ngei a ring tih a sawi.
FMGE&W president Er R Lalrammawia chuan Mizoram sawrkar hnathawkten transfer & posting vanga chenna in din kawnga harsatna an tawh thin chhawk zangkhai a, an tan loan hmanga awlsam taka in saksa lei tur an neih theihnan he thil hi ruahman a ni tih a sawi a. Ram hi sawrkarin pek niin, kum 2027-ah hna zawh hman an tum tih a sawi. Booking hi February 19 atang khan a tih theih tan a, kum khat chhung sawrkar hnathawk tan an hawng phawt anga, chumi hnuah a duh apiang tan hawn zui a ni dawn tih a sawi a ni.
Federation Enclave hi FMGE&W hnuaia Mizoram Government Employees Housing Society chuan Blue Mountain Engineering & Services Limited nena tangdunin chhungkaw 350, mihring 2000 vel chen theihna housing complex hi kum 10 vel kalta atang khan an buaipui tan a. Tuna hawn hi Complex Community Centre building niin, he building-ah hian sample flat dah nghal a ni.
A man (rate) dinglai chu a tlangpuiin (approximate rate) 2BHK nuai 47 vel, 3BHK chu nuai 60 vel, 4BHK chu nuai 77 vel a ni.
Federation Enclave sak mek hawng
