Mizo hmeichhe zaithiam hriathlawh berte zing ami Lalnunfeli, kum 34, Feli Fanai tia hriatlar chuan February ni 12, 2025, zing dar 2:15 khan Ebenezer Hospital-ah mual a liam ta. Feli Fanai hi September ni 8, 1991-ah piangin, F Lalbiakmawia (L) leh C Lalthantluangi te fa pali zing ami niin, a fapa te pahnih, kum 15 leh kum 14 mi te a kalsan a ni.
Feli hi Ebenezer Hospital atangin Ramlun North, Aizawl-a a chhungten a ruang lain, hetah hian Music Domain Mizoram (MDM)-in Feli thlah nan “Ni Tla Ngai Lo Zion Khawpui,” tih hla an sa a, nimin zing dar 5 vel khan an khua, Champhai Venglai panpui nghal niin, nimin chun dar 12 khan Champhai Venglai -ah vui a ni a, a vuinaah hian Aizawl atangin zaithiam Sawmtea Chhangte leh Sangkimi Khiangte ten zuiin, MDM leh zaimi dang awm ten ‘Van Hmun Ropui Hmangaih Ram Khi’ tih hlain an thlah leh bawk a ni.
Feli Fanai hian taksa lama insawiselna neuh neuh neiin, kum hmasa lam atangin a lo inenkawl tawh a, thin (liver) tha lo avangin nikum tawp lam December 20 khan a taksa a chauh zual deuh avangin Aizawl Hospital panpui a ni a, ICU-ah enkawl niin, hma a sawn hleih theih loh avangin January ni 6, 2025-ah Ebenezer Hospital ICU-ah sawn a ni a, damdawi in-ah hian a hun tawp thlengin a awm zui ta a ni.
Feli Fanai hian ‘Min Hlan Leh La,’ leh ‘Ka Chawi Nang Che,’ tih hla music video hmangin rimawi khawvelah a hming a chher tan a, November 2013-ah a album hmasa ber ‘Fam Khawlai’ tichhuakin, he album hi a pa chatuan ram pan ta hriatreng nan a pa thih champhaphakah chiah a tlangzarh nghe nghe a ni.
January 2020-ah a album pahnihna ‘Tuma’n An Tluk Lo’ a tichhuak leh a, he album hi a hla sak zinga mite hriat zui hlawh tak tak, a album title track ‘Tuma’n An Tluk Lo,’ ‘Lengdang |ang A Bel,’ tih leh ‘Pheichhehmawi I Khai Ang Aw’ tih hlate awmna kha a ni. Hei baka hian Michelle Varte leh Zaii Hauchhum te nena an album intawm ‘Ka Tan I Mawi’ tih an tlangzarh tawh bawk.
Feli Fanai hian album bakah single video a tichhuak nual a, a music video zingah ‘Ti ve mai la,’ ‘Pheichhehmawi i khai ang aw,’ ‘Tuma’n an tluk lo che,’ ‘Lengdang tang a bel,’ ‘Lungrun’ leh ‘Chhingmittui a hul zo ta’ tih te chuan YouTube-ah million views an nei pha vek a, nikum November-a a music video tihchhuah ‘Ka Entir Ang Che,’ tih chu a music video hnuhnung ber a ni ta a ni.
Mizoram-a rimawi lama chawimawina chi hrang hrang pawh a dawng kim hman viau a, 2016-ah Vulmawi Award Best Female Artist (lengzem/lenglawng) dawngin, 2017-ah |hazual Award best female artist (lengzem) leh best music video dawngin, 2018-ah Lelte Award best singer of the year (female) leh Moonligt Award special award for best female artist a dawng a, 2019-ah Lelte Award best music video leh |hazual Award best music video (lengzem) dawng ve vein, 2021-ah Moonlight Award special award for best female artist a dawng bawk.
Feli hian 2019 khan 1st Mizoram Entertainment Award-ah – Iconic Artist of the Year a dawng a. 2020-ah Pyramid Production House – People Choice Award : Zo Community dawngin, Music Domain Mizoram (MDM)-in an member te hnena chawimawina chi hrang hrang an hlan thin engemawzat a dawng tawh bawk a. Kum 2019 khan Heritage Hall of Fame : Heritage Diva’s – kawng hrang hranga mi hlawhtlingte huangah sengluh a ni tawh bawk a ni.
Feli Fanai a awm ta lo
