Fifa ranking tharah India tlahniam leh tawh! Head coach thar Khalid Jamil-a hnuaiah India men’s football team-in beiseina thar nei chho mek mah se tunhnaia FIFA men’s world ranking thar tarchhuahah erawh kum 2016 November ni 24 hnu lama an hniam ber tum an tawngbua a, ranking hmasaa 134-na luah kha a tharah hian 136-naah an tlahniam leh rih phawt!
Fifa ranking thara an dinhmun hi kum kaw chhunga an hniam ber tum niin, 2027 Asian Cup qualifying-a an beiseina hniam bawih zawnga tunhnai Singapore laka tlawm leh draw an neih khan a pawthniam a ni.
Tun tih loha India mipa team ranking hniam ber tum chu November 2016 leh October 2016-a 137-na an luah kha niin, an ranking san ber tum chu February 1996 daih tawha world number 94-na lai an han hawlh ve kha a ni!
Tarlan tawh thin angin, tunhnai Asian Cup qualifying third round match hniha Singapore an tum zawn tum khan away match-ah vanneihthlaktakin 1-1 draw an hlawhchhuak nawlh a; Margao lama home-leg game-ah beiseina a san hman viau laiin October ni 14 khan an kawtkaiah 1-2-in an tlawm a, 2027 Asian Cup khelh phak beiseina pawh a chuai ta hle a ni.
FIFA men’s world ranking thar berah hian reigning European champion Spain bawkin a sangber an luah chhunzawm a; Luis de la Fuente naute hian Paris 2024-ah khan Olympic gold awrhin, tunah hian an world title pahnihna tur atan inbuatsaihna lam an hawi tan tura ngaih a ni!
2022 FIFA World Cup winners Argentina chu Spain dawttu niin, nikum khan world number one ni chungin kum an khar a, a hma kum chiahin an chuti tawh bawk a; kumin hian Spaniard-ho hmakhalhin top-ranked nation nihna nen kum khar leh thei tak ang maw?
World number three-ranked team France hian nakkumah Didier Deschamps hoa an World Cup hnuhnungber tur an khelh tawh hmel.
FIFA ranking thar bera a sang pathumte inthlauhna hi point 18.05 chauh niin, an pathuma point hmuh belhkhawm hi 5,500 chuang a tling.
South America khawmualpuia sang ber Argentina tih loha he khawmualpui atanga world top 10 luah pha dang awmchhun Brazil chu pasarihna niin, Africa atanga tawng sang ber Morocco chu world number 12 an ni a; Asia top Japan chu world-ah 19-na an ni.
2026 World Cup inthlentawm tur leh North and Central America bika top three luahtu ni bawkte zingah Mexico sang berin 14-na an ni a, USA (16th) leh Canada (28th)-in an dawt.
September thla ranking-ah hian top 50 luah pha chinte zinga hmasawn ber berte chu a hma chiaha an dinhmun luah atanga pen riat ve vea kaisang Sweden leh Greece-te an ni.
Thla thar November ni 20-a men’s Fifa ranking thar an tarchhuah leh hunah India hmasawnna hmuh hman tawh inbeisei phawt ang!
Fifa ranking tharah India tlahniam leh tawh!
