Fifa ranking tharah India tlahniam leh tawh!
Ningania Fifa ranking thar tarchhuahah Indian football men’s team chu pen li laia tlahniamin 121-na an luah a, tunhnai kum liamta chhoa an hniam ber tum niin, thla hmasa Guwahati khaw 2026 FIFA World Cup qualifiers second round inkhela 1-2-a Afghanistan an hneh loh kha an tuar a ni.
March thla maia pen 15 zeta tlahniama 117-na an luah hma nikum December ni 21-a ranking tarchhuahah khan chuan India team hi 102-na an la ni pha a, a hniam zawng zelin an kal chho ta zar zar rih a ni.
Tarlan tawh thin angin, Igor Stimac-a team hi nikum khan Intercontinental Cup, Tri-Nations tournament leh SAFF Championship-ah an champion a, Fifa ranking-ah top 100 an luah pha hial kha a ni a, mahse, thla hmasa March ni 26 khan an aia ranking lama hniam zawk Afghanistan tihte mai mai chu home-ah lehnghal an hneh lo a, kha khan hniam lehzualah a hnukthla ta a ni.
World Cup qualifiers-ah Kuwait hnein, kum 20 chuang chhunga India-in away hnehna a chan vawikhatna lawm bawk mah se Qatar rama AFC Asian Cup 2023-ah a chhe thei ang bera inlanin, an match zawng zawngah an tlawm fai vek a ni satliah mai lo a, goal khat em pawh thun zo loin an tla a, Asia khawmualpui huap mipa football inelna sangbera an chetchhiat hnu khan ranking-ah pen 15 zeta hniamin 117-naah an chhuk.
Kumin January thla khan India hian point hmu lo leh goal khung lo zawng bawkin Asian Cup campaign an khar leh a, an result chu Australia (0-2), Uzbekistan (0-3) leh Syria (0-1) niin, team pali awmna Group B-ah a mawngphah an ni chiang hle!
Thla hmasa mai khan Blue Tigers hian Abha, Saudi Arabia-a World Cup qualifiers first leg second round-ah goal awm loin Afghanistan an inhnehtawkpui a, home fixture-ah chuan an ziaawm deuh tawh ang chu tih laiin Guwahati khelmualah an tlawm a, Indian fans thinrimin Stimac chu bang turin an au hial a nih kha!
Tuna an ranking thar 121-na hi hniam viau mah se an hniamber huna 173-na ai kha chuan a la tha fe a ni!
Fifa ranking thar berah hian reigning world champion Argentina chuan a sang ber luah chhunzawmin, 2022 World Cup runners-up France, England, Belgium leh Brazil-te’n top five an hnawhkhat.
Parukna Netherlands hnuaiah Portugal, Spain, Italy leh Croatia awmin, anniho hi top 10 luahtute an ni.
Fifa ranking tharah India tlahniam leh tawh!
