FIFA World Cup khelh tan a nih dan

June ni 11, Zanlai atangin Fifa World Cup 2026 khelh tan a ni dawn. ‘Khawvela ennawm ropui ber’ World Cup tobul atanga chhuin, World Cup 2026 thengin a tlangpui zawr zawr kan lawr kual ang.
Football a ram leh ram inkhel (International match) hmasa ber hi kum 1872 khan khelh a ni a, England leh Scotland te chu Glasgow khawpuiah inkhelin goal awm lovin an inhnehtawk. England leh Scotland inkhel hian ngaihven a hlawh viau a, a hmunah mi 4000 vel laiin an en. He inelnaahEngland leh Scotland an inkhelh hnu hian ram leh ram inkhelh an ching chho tan.
Kum 1884 atangin British Home Championship buatsaih a ni ve leh a. He inelnaah hian England, Scotland, Wales leh Ireland te an inel. Ram pali ten inelna an neih hnu hian ram pali leh an chhe vel ramah chuan football chuan vahchap kang ang maiin hma a sawn chak a, ram a la duai duai a ni ber mai.
Khawvelah football a lar chho zel a, kum 1900 nipui Olympic ah football inelna telh tan a ni. England hi football hmuchhuaktu nia inchhal, an ram football pawl pawh Football Association (FA) inti ngat an ni a. Olympic football pawh hi hun rei tak chhung chu FA kaihhruainaa neih a ni.
Kum 1904 ah khawvel huap football pawl Fédération Internationale de Football Association (FIFA) din a ni a. FIFA hian Olympic a football inelna hi kum 1916 atangin a pawmpui a. FIFA kaihruaina hnuaia inelna neih tur ni tawh mah se Indopui pakhatna in Olympic neih theih a ni lo.
Indopui I vanga Olympic neih theih a nih loh lai kum 1916 hian South America khawmuala ramten inelna an lo nei ve tan thung a. Hei hi tun thlenga Copa America tia hriat zui ta hi a ni. Kum 1916 vek hian South America khawmual football pawl CONMEBOL din zui a ni.
Kum 1920 atangin Olympic neih chhunzawm a ni a, inelna pakhat football pawhin ngaihven a hlawh leh zual sauh. Olympic 1920-ah hian football-ah Belgium an champion a. Olympic 1924 leh 1928-ah Uruguay an champion zawn thung.
Olympic-a football inelna in ngaihhlut a hlawh em em a, Copa America in ngaihhlut a hlawh chho ta viau bawk nen inelna lian zawk; khawvel huap football inelna buatsaih duhna FIFA hruaitute thinlungah a piang a, uluk taka an ngaihtuah hnuin 1930 a World Cup nei tan turin thutlukna an siam. World Cup hmasa ber hi FIFA President pathumna Jules Rimet khan an ram France-ah World Cup hmas ber thlentir a duh viaunaa a hlawhtling zo lova, Uruguay in a thleng.
World Cup hmasa ber thlengtu Uruguay hi Olympic football inelna hnuhnung pahniha champion zawn an ni a, hetihlai hian football a ram lian tak an ni. Football a ram lian an nih bakah an ram independence kum 100-a lawm mek an ni bawk a. World Cup thleng awm tak pawh an ni. Chutihlai chuan inkal pawh a la hautak em vangin Europe ram tam tak tan World Cup hmasa ber hi khelh ngaihna a awm lo ve thung.
World Cup hmasa berah hian South America khawmual atangin ram pa 7, Europe khawmual atangin ram pa 4 leh North America khawmual atangin ram pa 2 an tel a. Ram 16 te inelna tura ruahman ni mah se ram 13 an inel. World Cup final hmasa berah hian inelna thlengtu Uruguay chuan an thenawm ram Argentina chu 4-2 a hnehin an champion a, FIFA president Jules Rimet hming chawia an siam Trophy hlu tak an la. World Cup final hmasa ber hi a hmunah mipui 93,000 zetin an en a, a pui hem hem hle.
Khawvel huap inelna ni bawk mah se World Cup tir lam hi a nawi ve ang reng. 1936-ah Italy in inelna an thleng a. An thlen tuma Europe khawmuala ram te an kal that loh em vangin champion lai Uruguay an titau a, Italy-a an kal duh loh bakah World Cup 1938-ah an tel duh lo leh ngat bawk. World Cup 1938 hi Argentina in thlen an inbeisei em em laiin France-ah nghah a ni a. Thlentir an nih loh vang leh Europe khawmin an thlen zawn vangin Argentina an titau a, an tel duh lo ve leh bawk.
World Cup boruak a len chhoh sawt viau laiin Indo pui II-na a lo chhuak a, Indopui vang hian World Cup khelh hun tur 1942 leh 1946-ah neih theih a ni lo. Indopui a zova, boruak a intheh veng a, khawvel a lo ralmuang ve leh ta. World Cup chu 1950 atanga in neih chhunzawm leh a ni a. World Cup 1950 atang hian inelna hmasa lama tel duh ngai lo England an tel thar ve.
World Cup 1930 atanga 1978 thleng khan ram 16 an inel thin a. World Cup 1982 atangin ram 32 inelna atan tihlen a ni a. World Cup 2022 thleng ram 32 an inel thin a. USA, Canada leh Mexico ten an inthlen tawm, World Cup 2026 atangin ram 48 inelnaah tihlen a ni ta a ni. Champion hnuhnung ber chu Argentina an ni a. Argentina champion puitu Lionel Messi chu World Cup-ah vawi hnih Best Player ni thei hmasaber a ni bawk.