Final a intum tur Hunthar leh Muana Veng

LBS Suzuki 23rd Inter Branch YMA Volleyball Tournament 2024 khelh mek chu Inrinni zanah a hmawr bawk a ni dawn a; final-ah Hunthar leh Muana Vengte an inhmachhawn dawn. A vawi kua nana final lut turin Hunthar hian Chhinga Veng an hneh a. Vawi khat champion tawh Muana Veng hian boruak nei lian tak Khawhai an hneh ve bawk.
Champion zia
YMA Volleyball hnuhma nei tha ber, vawi riat final lut a, vawi thum champion tawh Hunthar hian Chhinga Veng lakah fiahna hautak an hmachhawn. An khingpui lakah hnufual chang nei bawk thin mah se champion zia an pu tlat a, team huaisen zawk an nih chhawr tangkaiin hnehna hlu tak an chang.
Mipa semi-final hmasa zawkah champion lai Hunthar leh a vawi khat nana champion tum, player nei tha tak Chhinga Vengin inkhel hmuhnawm an lantir a, set nga an khelh chhungin set thum ngawtah deuce hmangin chak zawk zawn a ngai hial. Pro Volleyball League khel chhunzawm tur leh Pro Volleyball player kawl khawmtu Chhinga Veng hian Hunthar lakah bul an tan tha viau a, set khatnaah an sang fal deuh ngar ngar. Awlsam taka set la tura ngaih an nih laiin an chesual a, an khingpuite an inpawhtlak tir ringawt. Set hmasa berah hian an deuce zak zak hnuin huaisen zawk Hunthar an tlang a, set la hmasa zawkah an tang.
Uiawm taka set khatna an lak hnuin Chhinga Veng an insiamtha a, harsa lutuk lovin set an la ta nge nge. Set khat ve ve an lak hnuin Hunthar dinhmun a derthawng hman. Chhinga Vengin set thumna an lak leh hnuin set linaah bul an tan tha viau a, point 7 ngawta hmahruai fal changte pawh an nei. Dinhmun chhe takah ding mah se Hunthar an huaisen a, an beidawng lo. Chiai hauh lova an khingpuite hmachhawnin an pawtthla nawn leh a, deuce atang bawkin an set hnihna an la.
Set hnih ve ve an lak hnuin deciding set-ah Hunthar in champion zia an chhuah a, a tir atanga sang fal ngar ngarin an khingpuiten an chhaihbuai pha meuh tawh lo. Hun pawimawh leh boruak sang takah Chhinga Veng player pawimawh Fabian Lallunghnema leh Lalbiakmuana ten ngai an awh phak tawh lova, an ni pahnih hi Hunthar lamin an dah tha a ni ber mai. Boruak sanga zam eih lo, defence tha em em Hunthar chuan 32-30, 20-25, 25-27, 27-25, 15-9 in Chhinga Veng an hneh a, final an lut ta a ni.
Semi-final hmasa zawk, inkhel hmuhnawm takah hian point 6/7 vela Chhinga Vengin hma an hruai pawhin a thlamuanthlak lova, an khingpuiten an pawtthla leh mai thin. Hetihlai hian Huntharin point 2/3 a hma an hruai erawh chuan a thlamuanthlak ang reng viau thung. Hei hian team hnihte rilru putzia a lantir thei viau awm e!
Volleyball thiam veng Hunthar hi final vawi kua an luhna a ni a, Kum 2005, 2009 leh 2022 ah an champion a. 2004, 2006, 2007, 2012 leh 2016 final ah an chak lo thung. Inrinni zan final-ah Muana Veng an hneh a nih chuan YMA mipa lamah Volleyball a vawi li champion thei hmasa ber an ni ang.
Khawhai hnehtu Muana Veng
Hmuhnawm taka semi-final a tawp hnuin Khawhai leh Muana Veng ten inkhel hmuhnawn an lantir zui ve leh a, vawi khat champion tawh Muana Vengin Khawhai kaltluang lai an titawp a, final an lut.
YMA Volleyball hnuhnung berah uiawm taka champion zo lo leh Inter Villa Volleyball competition-a champion lai, inelna neih meka champion tura rinkai ber ni bawk; Khawhai hian Muana Veng lakah bul an tan tha viau a, awlsam takin set khatna an la. Awlsam taka set khatna an lak hnuin an khingpuite an ngam zui viau naa an chesual ta tlat thung. Muana Veng hian deuce-ah point an hmu zawn a, set hnihna an la.
Set hnih ve ve an lak hnuin an inhnehtawk zui viau a, set thumnaah an insan chhawk zak zak. 18-18 a nih hnuin Khawhai an dawk zawk a, an khingpuite hi point khat bak an pe duh tawh lova, nuamsa pangngai takin set an la nawn leh. Inelna neih mekah champion tura rinkai ber leh boruak nei lian ber Khawhai lakah hnufual zawk ni mah se Muana Veng an beidawng mai lova, huaisen takin an khingpuite an beilet. Set lina tir lamah inlehthal zak zak mah se Muana Veng hian a tawp an khar tha a, an khingpuite an vuak tlang tir duh meuh tawh lo. Tichuan, harsa lutuk lovin set an la zui ve leh a, deciding set khelh a ngai ve leh ta.
Deciding set-ah Muana Veng in bul an tan tha viau a, point 4/5 vel laia hma an hruai fal vangin awlsam taka chak tura ngaih an ni hman. Tlawm tum hauh lo Khawhai in na takin an nawr let a, point a inhnaichilh hman viau. Game tight takah Valbuanga a che ropui a, Muana Veng chu Khawhai lakah 17-25, 28-26, 19-25, 25-19, 15-13 a chakpuiin final a hruai thleng ta nge nge.
Inrinni zan dar 8:00 ah mipa final khelh a ni dawn a, vawi thum champion tawh Hunthar leh kum 2018 champion Muana Veng an inhmachhawn dawn. Inkhel hmuhnawm tak a nih ngei a rinawm. Zanin hian hmeichhe final khelh a ni ang a, Bungkawn leh Vaivakawn an intum ang.