Finance Commission 16-na Mizoramah

Finance Commission 16-na Mizoramah
Finance Commission 16-na chuan Mizoram a rawn tlawh a, Pathianni khan an chairman Dr Arvind Panagariya hoin Aizawl an thleng.
Lengpui Airport-a an rawn tum hnu, Aizawl an pannaah Hunthar Venga lei tlahniam chu a hmunah an enfiah nghal a. Disaster Management & Rehabilitation leh Public Works Department hotuten lo dawngsawngin, kum 1990 atanga 2024 chhunga helai hmuna leilung chet dan leh inkalpawhna kawnga harsatna hrang hrang a thlen thin dan an lo hrilh bakah lei tawlh hniam zel tur venna atana hmalakna thenkhat kalpui dan sawiin, Mizoram khawpui Aizawl luhchhuahna kawng pawimawh tak a nih avangin leh helai hmuna chengte tan harsatna lian zawk a thlen lohnana ruahmanna an duan an hrilhfiah. An lo hrilh danin, Hunthar lei tlahniam nghawng zau zawng hi hectare 24.3 a ni.
Finance Commission 16-na member hi team hniha inthenin, Mizorama lo thleng hmasa zawk team-ah hian an chairman Dr Arvind Panagariya bakah Commission member – Ajay Narayan Jha (Union Finance secretary hlui), Annie George Mathew (Department of Expenditure special secretary hlui) leh Dr Manoj Panda (Institute of Economic Growth director hlui) te an ni.
Team thleng hnuhnung zawkah hian Commission secretary Ritvik Pandey, joint secretary Rahul Jain, director K Balaji, deputy director Maanas Bajpai, PPS to joint secretary Meena Mahendra, deputy director Liankhankhup Guite te an awm a ni.
Airport-ah hian minister Dr Vanlalthlana, adviser to CM (Finance) TBC Lalvenchhunga, chief secretary Khilli Ram Meena, Planning secretary Lalmalsawma Pachuau leh official dangten an lo dawngsawng.
Ni 4 an cham chhung hian chief minister leh Mizoram sawrkara hotute nen an inkawm anga, thuthar thehdarhtute an kawm dawn bakah political party aiawhte, Autonomous District Council aiawhte, local council aiawhte, trade & industry aiawhte an kawm dawn bakah Zoram Medical College & Hospital leh Falkawn Village Council an tlawh ang.