ZD Lalvunga
Re-Appropriate : Awle, han khak kual leh thuak thuak ang aw !!! Hei hi Sorkar hnathawk ho chuan an hre hne ang reng khawp mai. Major Head pakhat hnuaia sum kha chu pawimawhna apiangah khan Major Head hnuai ami kha chu a hman theih thin a. Post fill-up loh vangin, hlawh tur kha cheng nuai 4/5 lai alo chuang a nih chuan, Motor lei nan te leh Office Mamawh lei nan te an hmang thin a ni. Hei hian pawisa chu nasa takin tipung mah se, hman dik aiin hman dik loh hi atam mah zawk fo vang.
Financial Year : He thu (Words) hi a lar hle a, kan hre tlangpui awm e. April ni 1 atanga a kum leh March ni 31 chhung hi Sorkar “Financial Year” a ni a. U.T. lai khan MLA pakhat (Nomiated Seat) khan, Mizo kumthar leh Sorkar kum thar inang lo hi kan ram hmasawn theih lohna a ni tiin House-ah a sawi tawh a. 1st January ni lovin Sorkar chuan April lamah zawk alo tidaih mai si a.
He Financial Year hi March thlaah a tawp avangin, March thla hi Sorkar hnathawk thenkhat chuan, “Hlu” an ti hle thin a ni ngei ang, damsam lo chung chung pawhin office an kal hram hram thin a ni. Pawisa siam hun a ni a, Office thenkhat phei chuan, Dawrkaite hnen atangin an sum liam tur hman hrim hrim duh avangin, an neih loh chi thlengin lehkhain an siam rem thin a. Hmun thenkhatah phei chuan, pawisa hi a zangkhaiin a hnawk sak lo bera ngaiin, a tak awm lo hlir kha an dawr thin a.
Sorkar Financial Year tawp thlaa sum hman zawng zawng hi kum khat chhunga hman belh zawng zawng 1/4 a tling thei fo awm e. Sum liam tur chung chang leh, Supplementary Demands hian thui tak inlaichinna a neih a rinawm hun remchangah kan la bih hi leh mahna le.
Financial Administration: Sawi neuh neuh atang hi chuan, Mizoram hi Sorkar sum vawn uluk lohna ber a ni hial awm e. Ram dang atanga lokal, Mizoram rawn thawk tan tirte hian helai hi harsa an tih ber fo a ni a. He laia lo awm rei deuh tawhte lahin, helai hun hi hetiang mite hrawn hrehawm an tih ber hun a lo ni ve tho bawk a.
Awmze nei lovin Sorkar sum bo ta mai mai te, Electric bill pek thlenga han chhui chian a lo pilbo ta daih te, sem tur phei chuan ziak ang lo zat sum tlem zawk sem tak vak vak te, a pung awma Sorkar sum Bank-a lo dah bo lo, hetiang Case-hi kan ngah ta hle mai. Kan Financial Administration hi a hniam ta hle mai a. Dan in a sawi anga Drawing & Disursing Officer ten an nitin office sum han enfel thlap thlap phei chu an vang kher awm e.
Hetiang hi kan neih avang hian, zankhat mitchhinah, officer thenkhat an mualpho zauh zauh fo thin a. Mitthi khin hi a lo hahdam si a, leiba a thi pawh antam hle ta ve ang.
Kan indanna State Assam-ah pawh khuan Sorkar sum enkawlna lamah Mualphona namen lo an tawk a. Kum tam tak liam ta atang pawh khan (Kum 7 inkar) dik lo taka Treasury atanga Sorkar sum lachhuaka puhin mi 56 zet thiam loh chantir an ni a. Heng zingah hian I.A.S Officer pawh pathum zet an tel ve a ni. An sum tihchingpen kha cheng nuai hlir 17,500 zet niin an hria a ni.
Heng atang hian Sorkar pawh hian, sum hi vawng ulukin a veng khiau reng tur a ni. Official Sum thlakhata lut tur ven hi a khirh viau mai thei, engkim Process leh file movement engkim khawih leh chhawptu an ni tih erawh kan hriata Finance Minister mawh a ni tih mipuite hian kan hriatpui a tul awm e.