Sawrkar laipuiin a hman tawh forest dan thar chu Mizorama hman ve theiha Assembly House-a pawm a nih avangin he dan thar a nih ang anga hman duhlotute chuan Aizawlah punkhawm an huaihawt a. He dan thar hman duh lohtu tlawmngai pawl lianten an la duh loh reng thu an sawi rualin, punkhawmah hian pawl angin an inlan lo.Kumin August 27 Assembly Session-a Forest Conservation Amendment Act 2023 pass tak duh lohna leh dodalna hi Ningani khan, environment lam leh Mizoram thatna tur duhtu nia insawi pawl hrang hrang intelkhawmna – Joint Civil Society of Mizoram (JCSM) huaihawtin Vana Pa Hall kawtah neih a ni a. JCSM hnuaia tel pawl ho bakah NGO leh political party lam pawh sawm an ni.
Convener Dr Lalbiakmawia Ngente chuan, ramngaw humhalhna dan – Forest Conservation Act 1980 chu ramngaw humhalh leh humhimna atan a tha hle a. He dan tha tak siam danglamna tur – ram ngaw thiat a, sawrkar laipuiin project pawimawh bik a tih kalpui theihna tur FCAA 2023 chu Mizo mipui leh state roreltuten kan duh loa, Mizoram Assembly-in 2023 August 22 khan a lo hnawl tawh tih a sawi.
“Khatih laia nasa taka duh loa hnialtute, pawm (adopt) hlau em em tute khan, a rules leh guidelines kan han zirchiang a, a lo hlauhawm lo e; state sawrkar pawh thuneihna min pe sang sawt a ni, tiin 2025 August 27 khan an pawm leh thut mai a. Danpui (Act) tanpuitu atan rules leh guidelines hi siam thin a ni a, chu danpui kalpel chuan heng hi siam theih a ni lo. Danpui ber him lo leh hlauhawm chu rules Ieh guidelines atangin a hlauhawm loa siam theih a ni lo, tih hria ang u,” a ti.
FCAA 2023 chu a pumpuiin dan tha lo a ni loa, a nih ang ang erawh chuan Mizoram leh hnam atan a him lo tih Dr Lalbiakmawia Ngente hian a sawi. FCAA 2023 hi kan ram leh hnam, kan tu leh fa chhuan lo awm zel turte tan a him lo, tiin, “Sut leh ngei a ngai a. Kan ram hmangaihtu leh ram leh hnam tana beitu kan MLA-ten ngaihtuahna fim hmang a, he dan pawm tak ngaihtuah nawn a, sut leh ngei turin Mizo mipuiin kan ngen a ni,” a ti.
Thusawitu dang ZR Thahmingliana chuan, he dan hi an hlau ngawr ngawr a ni lo, a ken tel pawi thei thil hi chu an venthawn a ni zawk tih a sawi a. “Hmasawnna hi kan hlau lo, thuneihna hloh hi kan hlauh zawk chu a ni. Develoment hi kan do lo, development hi eng thapin nge kan neih dawn, engnge kan dahkham dawn, tih hi kan ngaihtuahna tithuitu chu a ni,” a ti.
Centre for Environment & Social Justice aiawha sawitu Joseph Hmingropuia chuan, a thalai puiten ram leh hnam himna an ngaihsak tawk tawh lo hle niin a sawi a. FCAA 2023 a ni emaw Forest Rights Act a ni emaw, corporate ho lo luh huk huna ram leh hnamin a tawrh theih dan an chik loa, dodal tur phei chuan an chechhuak peih lo niin a sawi a. Chu chu hnam tan a him lo hle tih a sawi.
Punkhawmah hian Central YMA leh MHIP Gen. Hqrs. aiawhin inlan an awm loa, FCAA 2023 an dodal reng thu erawh chhiarchhuah turin thuchah tawi an siam. Political party atangin MNF, MPCC leh PC aiawhten FCAA 2023 an dodalna thu an sawi a ni.
Forest dan thar duhlohna lantir A thlawptu NGO lam an inlan lo
