Forest department hnuaia thawk (Forest Guard) te chuan tunhnai khan |awi Sanctuary huam chhunga sava leh thehlei kaptu mi pathum an man a. Heng mi pathumte hian sava thahnem tak leh thehlei an kap a, a thlalak pawh social media lamah a darh nghal a.
Tunhma atang tawhin silai tha (enhlatna vuah silai) hmangtu an tam thu leh, heng silai tha neitute hian sava leh nungcha dang an kah nasat thu hi sawi luai luai a ni tawh a. A chang chuan han man zauh te chu awm bawk mah se, sawi nasat a nih ang huin manchhuah tak erawh an tam hran lo niin a lang.
Tuna hetia forest department mi leh saten sava kaptute manchhuah ngei tuma zan dar 11 thleng an lo chang thei hi an fakawm takzet a. Hetiang thak thaka hmalakna a awm thei a nih chuan, sava leh nungcha hrang hrang laka inlulingte pawh an tawm-im ang a, ecological balance pawhin a that phah ngeiin a rinawm.
Ramngaw leh a chhunga chengte humhalh leh enkawl hi Forest department mawhphurhna a ni a. Thawktute (abikin forest guard/ranger/warden etc) hi ramhnuaiah an inzarpharh tha hle tur a nih laiin, ramhnuaiah hian forest guard ang chi hi hmuh tur an awm tam lo nge, ualau taka silai pu chunga ramhnuai lam pan ngawk ngawk ngam hi an la kat nuk thei mai a, hei hi ngaihtuah chian a ngai hle niin a lang. Forest guard ho patrolling hi ramhnuaiah hian tun ai hian hmuh tur tam zawk thei se, nungchate laka inluling thinte hi an tawmim ve maiin a rinawm. An nihna ‘forest guard’ tih hi an activities hian a phawk zo lo deuh chu niin a lang. Tuna sava kaptute an manchhuak nalh nalh ang hian ramsa dang kaptute pawh manchhuak nalh nalh turin beihpui han thlak chho tak tak teh se; bazar lamah a ruka ramsa sa zuartu an la tam em mai!
Forest Guard
