Ningani zan khan Europa League 2025-26 khelh chhunzawm a ni a, manager thar Sean Dyche hnuaiah Nottingham Forrest in hnehna an chang nghal. Nottingham Forrest an chak lai hian EPL club Aston Villa chu mikhual an nihna hmunah Go Ahead Eagles hneh lovin an lo tlawm ve thung.
Dyche hnuaia hmasawn N Nottingham Forrrest
EPL 2024-25 ah rin phak baka khel tha a, Europa League hial khel phak Nottingham Forrest hi season tharah beisei phak bakin an khel chhia a, EPL-ah khelh riat atanga point nga chauh hmuin 18-naah an awm a, tlahniam thei dinhmunah an ding mek. Season tharah an chet chhiat em vangin manager pawh an thlak zut a, season kal meka an manager pathumna ni turin Sean Dyche chu tunhnai khan an la lut. Manager thar Dyche hnuaiah hma an sawn a, Europa League-ah Portugal club lian FC Porto hnehin point thum an hmu nghal.
Nottingham Forrest hian City Ground-a an mikhual FC Porto an ngam viau a, goal thun ngei tumin an nawr na hle. An mikhual Porto lakah hian an khelh that piahah an vannei tel a, penalty vawi hnih an hlawhchhuah. Penalty hmasa zawk hi inkhel tan atanga minute 19-na leka an hmuh a ni a. Morgan Gibbs-White chuan harsa tawk lova pet goal in minute 19-naah hmahruaina goal a thun.
Hma takah goal an thun vangin an phur a, goal thun belh tumin an mikhualte an nawr zui nasa hle. An mikhualte nawr zui nasa viau mah se goal dang an thun belh thei lawk lo thung. Hun rei tak chhung goal lut a awm belh theih loh hnuin an vannei nawn leh a, hun tawp dawn hnah lamah penalty an hmu nawn leh. Minute 77-naa penalty an hmuh chu Igor Jesus chuan pet goal in an goal hnihna a thun a, an hmahruaina a tizau. Jesus goal thun hnu hian goal dang lih belh lovin inkhel a tawp a, season kal meka chak harsat Nottingham Forrest chuan hnehna changin point thum hlu tak an hmu zui ta a ni.
Tarlan tawh vangin Nottingham Forrest hi season tharah an talbuai viau a, inelna hrang hrangah hnehna an chang hlei thei lo. EPL-ah an buai zual em vangin manager pahnih ngawt an ban tawh. Chelsea lakah chiang taka an tlawm hnuin tunkar tir lam khan an manager an ban a, an manager thar atan Sean Dyche an la lut. Dyche hnuaiah hmasawnna hmel hmuh tur a awm nghal a, Europa League-ah a chak nghal phawt. Pathianni zan hian EPL-ah AFC Bournemouth an hmachhawn zui leh dawn a, an chak zui leh thei a nih chua inrintawkna sang zawk an nei thar leh ang a, hma sawn turin hma lam an pan thei ang. Bournemouth lakah an tlawm a nih erawh chuan an dinhmun a chhe zual sauh thung ang.
Aston Villa an tlawm
Europa League-ah Nottingham Forrest an chak laiin Aston Villa chu Mikhual an nihna hmunah 2-1 in an lo tlawm ve thung.
Aston Villa hi Go Ahead Eagles hmachhawn turin De Adelaarshorst-ah an lenglut. Mikhual an nihna hmunah hian Evann Guessand chuan inkhel tan atanga minute lina lekah hmahruaina goal a thun nghal a, bul an tan tha hle. Bul tan tha viau mah se mualneitu team er let an dawl zo lova, goal hnih an chhuah.
Go Ahead Eagles tan hian Mathis Suray chuan minute 42-naah goal thunin an si phurh a sut a. 1-1 a nih reng hnuin Mats Deijl chuan minute 61-naah hma an hruai letna goal a thun. He goal luh hnu hian goal dang a luh belh thei tawh lova, inkhel hmuhnawm takah Go Ahead Eagles chuan hnehna an chang ta a ni.
Forrest an chak
