National Highway No.306 huamchhung Kawnpui leh Khamrang inkara ram neitute chu four lane atana ram lak turah ram neitu diktak chauhin an phu tawk compensation an lak mai tur thu sumdawnna atana hman tur a nih loh thu hrilh an ni.
Kolasib addl DC DC, Competent Authority for Land Acquisition (CALA) Melody Ngurthantluangi chuan Thawhlehni khan hemi huamchhunga ram neitute hi kokhawmin hun kal tawha sawrkarin ram a laknaa thil thleng tawhah fimkhur a tul zia an hriat avanga inkokhawm an ni tih a sawi a. NH-306 (Silchar – Aizawl panna) a four lane siam tura ram neitute hnena zangnadawmna pekchhhuah tawh, package dangah thil diklo leh felhlel tam tak a awm nia a lan avangin tuna hmabak, package 7-naah chuan a dik thei ang bera ram teh tum a ni a, ram neitute hnenah zangnadawmna felfai taka pek chhuah a nih theih nan fimkhur taka kal an tum tih a sawi.
Package danga compensation dawngtu zingah mahni ram awmna pawh hre lo, an ram zau zawnga nena inmil lo tih hriat reng khawpa thlai leh thil dang dang awm anga assess leh, sum duh vanga virbuai huai huai an tam tih CALA hian sawiin, tuna hma an lakna turah chuan thamna leh diklo taka inbum tumna, ram leh thlai awmte hlutna baka thil tih tumna a awm an remti dawn lo a. Ram teh hunah ram neitu ngei emaw compensation dawngtu tur ngei emaw a hmunah awm theuh turin a chah lawk tih a sawi a ni.
Kolasib DC office-a SDC, 4-Lane Branch officer Dr Lalramdintluanga chuan ram neituten ram teh ni ah lehkha felfai tak an ken a tul tih a sawi a. Package danga zangnadawmna tur tihfel tawhah pawh a dawngtu tur diktakte hnenah chauh sum pek chhuah a ni dawn tih sawiin, thil felfai lo hriatchhuah a nih chuan, sum pek a ni dawn lo tih a sawi lawk. Ram pass pakhat chhunga compensation dawngtu tur pahnih-thum emaw an awm chuan bank-ah joint account siamin, PAN card pawh siam ngei turin a chah bawk.
Four lane atana compensation dawng turte hnenah dan diktaka ti turin hrilh
