France-a lungawi loh lantirnaah tharum thawhna thleng nasa

France-a sikul inenkawlna chhia leh khawsak man sang lutuk avanga lungawi loh lantirnaa tharum thawhna nasa tak a thleng zui leh.
Inrinni khan kawtthlerah mi 5,50,000 vel chhuak lehin French sorkar chuan ‘tharum thawhna a punlun’ tia sawiin mi 1,200 vel man an nih thu a sawi.
Paris-ah chuan zanah tear gas leh tuia mipui phuhtu riot police nen mipui hi an innawr nasa hle.
Khawpui bakah hmun dangah in hal a ni a, Limoges-ah chuan town hall-a kangmei nasa tak chhuakah a chung thenkhat a chim phah.
Khawpui hrang hrangah inrawkna a thleng a, city hall leh sumdawnna hmunte suasam a ni bawk.
Prime Minister Sébastien Lecornu-a chuan police officer zinga 150 velin hliam an tuar tih a sawi.
Paris-ah chuan chawhnu thlengin boruak a muanawm hle a. Khua a thim tan tihin mi thenkhatin khawlaiah thil an hal a, lirthei an hal bawk a, thenkhat chu khawpui laili, Place de la République-ah te pawh a ni.
Dawrte suasam a ni a, thingpui dawr pakhat a kang bawk a. Paris lailiah chuan riot police-ten pungkhawmte chu tiang nen an hmachhawn.
Lyon-ah Mayor Grégory Doucet-a chuan an tourist office kang chu khawpui dan ‘lungchhiatthlak’ a tih thu a sawi a, BFMTV hnenah ‘kan khawpui chhinchhiahna a ni a, kan rilru a na hle’ tih as awi.
Limoges town hall kang pawh kang thelhtuten an thelh a, a in thenkhat chu chim mai theiin a awm niin an sawi.
Chhimchhaka Saint-Étienne-ah thalai mipa pakhatin ‘grenade-in a ban a thlawh’ tih sawiin Mayor Régis Juanico chuan pawi a tih thu social media-ah a tar lang.
Interior ministry chuan lungawi loh lantirnaah hian an khawpui, Marseille, Rennes, Toulouse leh Angers leh hmun dang thenkhatah ‘mi tuten emaw tharum thawh tumna’ an nei niin a sawi.
Grenoble, Avignon, Pau, Montpellier leh Valence bakah hmun hrang hrangah in tihchhiat sawi a awm.
Paris-ah chuan thawmhnaw dawr suasam a ni a, Lille-ah chuan Apple store rawk niin a ruak vek.
France-ah hian zirlai sang telin tun hnai chawlhkar eng emaw zat chhung hi kum 15 leh 18 luhna secondary school enkawlna chhia, an sikul building chhia leh thawktu indaih lohna avangin lungawi lohna an lantir mek.
Inrinni bikah hian sumdawng pawl leh mi dangten an zawm a, boruak a sosang lehzual a. Nakum maia inthlang tur an nih tawh bawk avangin politic-a inbeih nan pawh an hmang nasa hle.