Ram tana chetchhuah ngaih huna thei lo tura insawi chunga club tana a inkhelh leh theih si avangin France captain Kylian Mbappe chuan tunlai hian a chipuite sawiselna a tawk luai luai mek!
Europe ramte league-a inelna Nations League lamah France hian Group A table-ah pahnihna an luah mek a, hmasawn zel an tumna kawngah Ningani hian Budapest khuaah indona avanga an ram chhunga home game khel thei lo Israel an hmachhawn ang a, karleh Thawhtanniah Belgium an luhkhung zui leh ang.
He match pahnih khel tur squad thlannaah Les Bleus boss Didier Deschamps chuan a captain biain, Mbappe hian France duty a inzuam rih loh thu a lo hrilh a, karhmasa Ningania Nations League match hnih khel tur squad thar a puanah France coach chuan Mbappe a telh ta lo a; mahse, French forward hian karliamta Inrinni khan La Liga lamah a tir atanga lutin Villarreal a hmachhawn leh thei tho si a, French-ho an lawm lo!
Kum 25 mi Mbappe hian thla hmasa khan a tihrawl a tina a, mahse, karleh Nilaini pawh khan club tan Champions League game chu a khel thei a!
Ram tana a theih loh thu a sawi laia club lama a inlan zel thei lawi si hrethiam lotu zinga pakhat chu France international hlui Maxime Bossis niin, French sports daily L’Equipe hnenah a ngaihdan a nih loh thu heti hian a sawi:
“I inhliam a, club tan pawh i khel thei lo a nih chuan national team lamah pawh an ko lo ang che, mahse, Champions League-ah bench thawhsanin khelmual i lut thei a, league game lamah phei chuan bultantu zingah i tel thei a, thil hi chu a mak ve a ni. Michel Platini-te ang kha chu a inhliam lai pawh ni se ramin a mamawh chuan kan kiangah a awm zel thei,” a ti sak sak!
Karhmasa maia international football chawlhsan ta Antoine Griezmann chungchang pawhin sawi a hlawh zui zel a; ani kha chuan a tha lama comment a hlawh a; kum 2017 leh 2024 inkara chawlh nei miah loa France game zawng zawng vawi 84 a khel ki vekte khan national team-a Paris St Germain player hlui Mbappe demna a belhchhah!
France supporters’ group Irresistibles Francais an tiha an thupuangtu Fabien Bonnet pawhin Les Bleus captain thar demna auchhuahpuiin, “Captain a nih ang ngeiin Mbappe hian fans hmuhah example a nihna a phochhuak tur a ni. Hei chiah hi captain dik tak Antoine Griezmann-ah khan kan hmu thin a, a kalbo ta a,” a ti!
France duty kalkana inkhel Mbappe an dem rawn!
