France PM Barnier duhlohna lantir

Centre-right politician Michel Barnier Prime Minister atana ruat a nih duhlohna France ram puma lantirah mi 100,000 chuang an inhnamhnawih a.
Tun hnai lawka France inthlanna neihah left-wing blod – New Popular Front (NPF) te chuan seat ber an la a.
Tuna lungawilohna lantirna pawh hi NPF leh trade union member tena an huaihawt niin prime minister atana an chhawpchhuah chu President Emmanuel Macron an a hnawlsak avangin an lungawi lo a ni.
Barnier hi EU’s Brexit negotiator hlui niin political spectrum hrang hranga politician-te left te pawh tela sorkar siam theih a inbeisei thung.
Lungawilohna lantirnaah hian interior ministry chuan mi 110,000 vel an tel tiin a sawi a, Paris ah ringawt pawh mi 26,000 vel pungkhawmin mahse protest leader te chuan pungkhawmte chu mi 300,000 chuang an ni an ti ve thung.
Radical France Unbowed party veteran firebrand leader Jean-Luc Melenchon chuan lungawilohna neihnaa thusawina a neihah ‘Democracy tan Macron tihtawp a ngai’ tiin a sawi a. Lungawilo pungkhawm te chuan ‘democracy phatsanna’ tih te leh ‘election ruksakna’ ti te in an au bawk.
Left party-te chuan prime minister atana an candidate Lucie Castets chu Macron-an a hnawl tia sawiin Macron chaun National Assembly-ah a tlang zo dawn chuang lo tiin chhuanlam a siam an ti bawk a.
Prime minister atana ruat thar Barnier chuan far-right te seat hmu hnem ber te chuan amah duh lo hrim hrimin vote an hlak kher dawn lo an tih avangin fiahna paltlang thei a ni thung a. Chu tak chu amah sawisel phahna pawh niin a sorkar chu far right te zahngaihna hnuai awm sa tiin sawisel a ni.
“Prime minister hi National Rally a innghat bur a ni nghal” tiin Castets chuan a sawi zui bawk.
Barnier chuan kar kalta Inrinni pawh khan Paris a children’s hospital te tlawh nghalin chutah chuan public services pawimawhzia a sawi a, mahse, healthcare workers te hnenah a sorkar chuan thil mak a ti nghal thei lo tiin a intlawhkhalh nghal thung.
A laka lungawilohna lantirna karah PM thar chuan sorkar thar a siam turah inbiakna kalpui mekin right-wing Republican party leader te nena inbiakna neiin boruak a tha hle tiin a sawi.
Left zingah pawh PM atana Barnier chhawpchhuah a nihnaah indemtawnna thleng bawkin, Socialist Paris mayor Anne Hidalgo chuan president Macron chuan Socialist prime minister hlui Bernard Zazeneuve chu PM atan ruat a duh laiin a awmna ngei party ten an hnawl a ni a ti.