Champion lai leh a zawna French Open title vawithum lak tuma Paris thgutchilh mek Poland nula Iga Swiatek chuan Pathianni khan a fourth round match-ah game khat lek pawh hloh loin Russian Anastasia Potapova lakah 6-0, 6-0 hnehna awlsam a chang a, chiang takin quarter-final a lut.
World number one Swiatek laka tih theih nei lo Russian tan Grand Slam chawlhkar hnihna a chuankai vawikhatna niin, Court Philippe-Chatrier chhunga mipuite khan a zuai lutuk tur tihphur tumin tan han khawh ngial bawk mah se Pole top seed lakah ‘eh’ pawh a ti hman lo a ni ber e!
He thu buatsaih lai hian last eight lama Swiatek-i tum leh tur a la chiang lo a, fifth seed Marketa Vondrousova leh Serbian qualifier Olga Danilovic inkhela chak zawk zawk an ni’ang.
Pathianni fourth round inkhel dangah Tunisia beiseina Ons Jabeur pawhin Denmark nula Clara Tauson laka 6-4 6-4 hnehna changin a tumhnihna atan French Open quarter-final a lut a, ani hi erawh rim taka thawk chunga tlang a ni thung.
World number nine Jabeur hian 72nd-ranked Tauson hi a nau chei thei bik lo a, a thu hrimah Tauson kha second round-a 2017 Roland Garros champion Jelena Ostapenko vawtlatu, third round-a Roland Garros runner-up lo ni tawh Sofia Kenin hneh leh ngattu kha a ni ve a, kum 29 mi Tunisian tan pawh beih ve ngial tham a tling.
Jabeur hian Wimbledon final tum hnih khel tawhin, nikum US Open final lut bawk mah se champion zo lo vekin runner-up a ni a, tun hi a Grand Slam title hmasaber tur a beiseina la ni kal zelin, semi-final luh inchuhna lamah world number three Coco Gauff a tum leh dawn a, American mihang nula chu a tawh a khirh dawn tih sawiin, inkhel ropui tak a nih tur thu a sawilawk.
American world number three Gauff hian a fourth round match-ah Italian Elisabetta Cocciaretto laka a khawngzia lantirin 6-1 6-2 hnehna awlsam nen quarter-final a lut a, 45th-ranked Cocciaretto tan kum 2022-a Paris final khel tawh leh nikum US Open champion hmachhawn kha a khirh lutuk mah mah a ni!
Kum 23-a upa Coco Gauff hian kum 2015 champion Serena Williams hnu lama American zinga Roland Garros grand slam title la leh thei hmasaber nih a tumna kal zelah player khawng zet Jabeur a su zui leh dawn a ni.
Last eight lut dang leh chu second seed Aryna Sabalenka leh world number four Elena Rybakina-te an ni.
Nimin khan Belarus nu rothap Sabalenka hian Emma Navarro lakah darkar khat lek chhungin 6-2, 6-3 hnehna a sualchhuak hman a, Paris-a a title hmasaber tur a beisei mekna kawngah nuamsain quarter-final a lut.
American Navarro hian kumin March thla mai khan Belarusian hi rin loh takin Indian Wells-ah a hneh nawlh a, Roland Garros-ah erawh Australian Open champion hian tlawm nawn lam a hawi lo kher mai a, kumin major tournament bikah a zawnin match 11 a chak tling ta a, hetih kawngah hian set khat mah a hloh leh lehnghal!
Kum 26-a upa Belarusian hian a Grand Slam title pahnih lak ve tawh belhchhah tura a beih mekna kal zelah Varvara Gracheva of France leh tleirawl Mirra Andreeva inkhela chak zawk zawk chu last eight-ah a tum leh dawn a ni.
Russia rama piang, a hnua Kazakhstan khua leh tui ni zui ta Rybakina chuan fourth round match dangah 6-4, 6-3-in 19th-ranked Ukrainian Elena Svitolina a hneh a, a vawihnihna atan French Open quarter-final a lut.
Kum 29 mi Svitolina khan nikum telin French Open last eight hi tum li a lo chuangkai tawh a, tawnhriat pawh a nei tha ve thawkhat tawh a, mahse, Wimbledon champion hlui lakah beisei angin a khel chhuak zo lo.
Tun kha Rybakina tan kum 2021 hnu lama French Open quarter-final a luh leh vawikhatna niin, semi-final luh inchuh match pakhatah 70th-ranked Russian Elina Avanesyan leh 15th-ranked Italian Jasmine Paolini inkhela chak zawk zawk a tum leh ang.
French Open inthlifim zel
