Fridge-a sa dah rei lutuk hi a tha lo niin mithiam ten an sawi a, ni 10 aia rei dah phei chuan a protein a tihchiat bakah a hygiene te pawh a kawih pawi thei niin an sawi a, chu chuan food poisoning leh pum lam nawm lohna te a thlen thei niin an sawi.
Pakistan Institute of Medical Sciences Gastrologist Waseem Khawaja chuan, “Fridge-a sa dah rei lutuk ei hian pum lam natna te a thlen thei a, chubakah thin (liver), kal (kidney) leh thluak te a khawih thei,” tiin Associated Press of Pakistan a hrilh.
Khawaja chuan pum leh ril lam (gastrointestinal) natna hrang hrang kan neih chhan tlanglawn ber chu sa thianghlim tawk lo leh hmin tha lo kan ei vang niin a sawi a, heng sa thianghlim lo leh hmin tha loah hian bacteria a inthlah pung zung zung thin niin a sawi bawk.
Khawaja chuan thin lam natna hepatitis leh liver disorder te pawh a thlen thei niin a sawi a, ran dam lo saah chuan protein leh vitamins te a awm mang lo niin a sawi a, chung sa te chu mihring tana natna thlentu mai a ni zawk, niin a sawi bawk.
Fridge-ah sa dah rei lutuk suh!
