Fruit Beer leh a behbawm…

Mizoram Liquor (Prohibition) Amendment Act, 2025 hnuaia Local Fruit Beer manufacturer leh Winery licence pekchhuah tur thlangtu tura din Selection Committee chuan dilna 99 lut zingah mi/firm 11 a pawm a. Local fruit beer leh wine siam thei tur tehfung zingah hian, food safety guidelines an zawm thei em tih te, a siamna hmanrua puitling an nei em tih te, chung hmanruate tha taka hmanga enkawl thei turin mihring leh sum an nei em tih te leh, Mizorama thei leh thlai tharchhuah ngei hmang dawn se an tlin ang em tih te a tel a ni.
He Dan-in Mizorama thei leh thlai tharchhuah a tihte hi: Sawhthing(Ginger); Balhla (Banana); Chawngthei (Dragon fruit); Sapthei (Passion fruit), Lakhuihthei (Pineapple; Sunhlu, (Gooseberry); Kawlthei (Guava); Theiherawt (Starfruit), Fû (Sugarcane); Lamkhuang(Jackfruit); Dawnfawh (Watermelon); Hmazil (Honey dew melon) etc. tih a ni.
Kan hriat angin MIFCO chuan Chhingchhip-a Fruit Juice Concentrate Plant (FJCP) atangin Sapthei, Lakhuihthei leh Serthlum Juice, Squash leh RTS(ready to serve) te a siam chhuak a, hei hi chuti takin a hralh a kal lutuk lo niin a lang. A chhan chu, heng thei chi thumte hi Mizoramin a thar chhuah hnem pawl a ni chungin, a chhawr tangkai ber tura ngaih leh beisei FJCP hian thei tharchhuaktute hi a dawr tam thei lo a, farmer-te hian local market-ah harsa takin an zuar chhuak ve hram hram thin. Heng theitui te hi a hralh kal se chuan, Mizoram thei chingtute tharchhuah hi FJCP hian a buan tawk ve viau tura ngaih a ni a, local market-a zawrh tur awm mang lo khawpin a dawr thei tlat lo niin a lang.
Fruit Beer chungchang kan sawi dawn a, fruit juice sawi hmasak a tul a; a chhan chu ‘a juice’ ang zawnga value addition siam aiin ‘a beer’ ang zawnga value addition siam hi kuthnathawktute malsawmna tur nia kan rin vang a ni ber awm e.
Juice-ah chuan ‘alcohol’ a tel ve lo a, Beer-ah chuan alcohol a tel a. Liquor Prohibition kan han ti tak na a, alcohol telna chi khapna dan a ni a, mahse tunah chuan he Dan hnuaiah hian alcohol telna chi siamchhuah theihna kan zep tel leh tho si a ni. Kuthnathawktute tinzawn a nih chuan a tha turah kan ngai a ni phawt mai.
Tun dinhmunah hian license nei an la awm lo chungin fruit beer hrang hrang hi chu exhibiton leh festival hrang hrangah hmuh tur a tam tawh hle a. Hetia license hnuaia beer siam theih a lo nih takah hi chuan, fet taka kalpui a tul dawn hle tih a lang mai awm e.
Chutih ruala thil lo lang chu: Leo Tolstoy-a thawnthu “The Imp and the Peasant’s Bread” ang deuh khan, ramhuai hian kan tharchhuah malsawmna hi zu siamna atan min ruahmanpui ve mai chu a ni em lo turah ngai ila; kan inven thiam erawh a pawimawh dawn hle a ni!