Kan hriat angin Kolasib district kawngpuite a chhia a, nikum lam atang tawhin buaipui luai luai a ni a. Kawngpuii siamtu lamin an thawk zung zung lo ve bawk a nih hmel a, hemi chungchangah hian, Kolasib-a Y4K, MUP, MZP leh lirtheia eizawng pawl hrang hrang ten hmalakna neiin, Joint Action Committee on National Highway (JAC) chu tun thla thar February thla tir khan din a ni a. JAC on NH hian tun hnaiah lungawilohna lantir nan Peaceful Demonstration an huaihawt a, kawng te an zawh a.
Hemi chungchangah hian, ZPM Thalai General Hqrs thuchhuahah, “Kolasib-ah Opposition Party fuihpawrh theih thalai thenkhat ten kawng zawh in, hmasawnna kawng siam hna thawk mektute tan harsatna siam zawngin hma an la…” tia tarlan chu JAC on National Highway chuan, “Eng party mahin a fuihpawrh vang a ni lo a, Kolasib hmangaihna vanga pawl hrang hrang inzawmkhawm ten Kolasib-in kawngchhia a tawrhna a nasat tawh em avanga rilru nâ leh NHIDCL ten Kolasib min hmusit em avang leh min tham lo em avanga hmalakna a ni,” tiin an sawifiah a.
ZPM thalaite hian opposition party lam dinhmun phetna tur a nih beiseiin leh mipui lamin an mawhchhiat zui theihna tur a nih ringin ‘fuihpawrh’ tih tawngkam hi an hmang ta mai nge? A nih loh leh, ‘fuihpawrh’ tih tawngkam leklam remchang deuh tur hian opposition party hruaitute tu emawin tawngkam an lo cheh zawk nge? Kolasib district huapa hma la tura pawl hrang hrang inzawmkhawm JAC meuh ding ve ta lem chu, tu te emaw fuihpawrh vang mai maia hma la tur chu an ni bik dawn em maw ni le? a tih theih awm e.
Thil pakhat chiang tak a awm sa a, chu chu nikum lamah pawh minister/MLA ten a hmuna awmchilh ngai khawpin kawngpui chhia avangin kan buai luai luai a nih kha. Kawng siamtute harsatna siam zawnga lo inrawlh chu JAC meuh chuan an ti duh lovang tih a lang chiang mai awm e. Kawngzawh ngai khawpa thil a thleng tawh a nih chuan, ruling tan hmingchhiatna em em pawh a ni lova, kawng siamtuten an mawhphurhna an hlenchhuah that loh vang a ni a, chu chu a ruling lam party chuan hna thawk chak tura kawngpui siamtu company-te hi lo hrawk ve khar khar zawk awm tak a ni.
Hmasawnna hnathawh kawngah hian, a ruling e, a opposition e, lam sawi lovin, kan ram leilunga kan ram hmasawnna hna thawktuten an thawk tha em tih hi hnam rilru/thinlung pu chung hian i vil tlang mai teh ang u.
Fuihpawrh….?!
