Fur ruah tla tlem hmachhawn turin India-in inruahman

India chuan a nih dan pangngai aia tlem fur ruah sur leh khawvela mihring tamna ber rama thlai chi hrang hrang a nghawng theih dan dawn avangin lo hmachhawn turin ruahmanna a siam mek.
Fur kal mekah tun thlengin India-ah hian ruah sur tawh zat chu a nih dan thin pangngai aia 43% velin a la tlem zawk a, Indian Meteorological Department (IMD) chuan July 2-a tawp tur chawlhkar thlengin ruah a la sur tlem chhunzawm dawn tih an sawi niin Agriculture Minister Shivraj Singh ⁠Chouhan-a’n Thawhlehni khan a sawi.
India-ah hian kum khata ruah sur 70% vel hi fur laia sur thin a ni a, mihring tluklehdingawn 1.4 vel chenna rama mite tan an tui hmuhna hnar pawimawh ber a ni a. An rama lo zahve vêl zetin tui lakna pangngai an nei lo va, mihring zahve chu lo neia ei zawng an ni thung.
Dan pangngaiah chuan fur ruah hi June 1-ah India chhim tawp, Kerala-ah a thleng tlangpui a, hmar lam hawiin a darh zau zel thin a. Ram sum leh pai dinhmun atan a pawimawh a, lo neitute chuan la, bekang, fu, buhfai leh vaimim chinna tui atana an rin a ni.
Kumin hian Kerala-ah a dan pangngai aia ni thuma tlaiah ruah hi a thleng chauh va, hei hian India economy $ tld 4 nghawng pha ngei tura ngaihna a awm.
Sik leh sa inthlakin India-ah pawh khaw awm dan a tidanglam a, khua a tilum zual a, kumin hi El Nino thlen kum a nih bawk avangin ruah sur tlem tura sawi lawk a ni bawk.
Thawhlehni khan chawlhkar tam tak khaw lum uchuak takin a em hnuah Mumbai tan hahdamna thlengin a vawi khat nan ruah a sur a, daiah tla tlem deuh mah se khawpuia cheng maktaduai 22 tan lawmna a thlen.
“Arabian Sea lailia la awm fur ruahin hma lam a la pan zel a, Mumbai pawh tiamin Maharashtra hmun thenkhatah pawh a kal zel bawk,” tiin Meteorological Department chuan a sawi.
Mumbai-a thuneitute chuan kar hmasa khan tui hman danah khuahkhirhna an siam a, tui chenna hmun leh in sakna hmunah tui pek an titlem a ni.
Mi tam tak chuan zan boruak lum tak laka hahdam nan tuipui kamah an mu a, mi bit taka an chenna khawpuiah hian mi tam tak chu air conditioner nei lovin an awm a ni.
Chouhan-a chuan kumin khaw awm danah harsatna a awm avangin tui ren chu ngaih pawimawh ber a ngai tih a sawi a. “Far khat pawh a hlu a, chu thil tum nen chuan ruahmanna siam a ni,” a ti a, hei hian tuikhuah, dil leh lui siam that leh tihlen a huam tih a sawi.
Thlai, ei leh in man leh eibar than a thut hlauhna a awm mek a, thla hmasa khan IMD chuan kum 2026-a El Nino vanga fur ruah tla tlem hian kum 11 chhunga ruah sur tlem ber kum a thlen thei tih an sawi.
Australia-a weather bureau chuan tun thla tir lam khan El Nino chu tropical Pacific-ah a insiam tawh tih a lo sawi tawh a, kum chanve hnu lamah a zual thei a, kum sawmsarih chhunga a chak ber zinga mi a ni thei dawn niin an sawi.