Kumin March 2-a Mizoramin G20 meeting a thlen tura inpuahchahna kal mekah chief coordinator Harsh Vardhan Shringla leh a thawhpuite chuan Inrinni khan chief minister Zoramthanga hmuin an inkawm.
State danga G-20 meeting thlen tawh dan leh state hrang hrang inpuahchah dante sawifiah niin, Mizoram atanga an beiseite an sawi a. India ramin G-20 presidency a chelh chhung hian khawvel mithmuha ram hmasawnna leh India rama hmun leh culture danglam tak tak mawina phochhuah tum a nih avangin ngaihpawimawh tul an tihte an sawi. G20 meeting nghahna tur khawpui hrang hrang cheibawl kawngah leh khawpui infrastructure tihchangtlunna atan remchanna la turin ruahmanna siam tha an tih thu an sawi a. Delegate-te hi khawvel ram hrang hrang atanga lokal tur an nih avangin hnam ziarang phochhuak a, mahni state theuh hmasawnna tur theihna awmte pholan thiam pawimawh an tih thu te an sawi bawk.
G20 chief coodinator hian chief secretary Dr Renu Sharma hoin Mizoram G-20 Core Team leh Sub-Committtee te a thutkhawm pui bawk a. Security & traffic, logistics & transport, conference, programme & event management, information & publicity, medical, protocol, hospitality, accommodation, reception, aviation, IT & multimedia leh thil danga Core Team leh Sub-Committtee te inbuatsaihna thlirho leh sawiho a ni.
Tun thlengin G20 meeting 10 chu khawpui 9-ah neih a nih tawh thu te, India ram pumah G20 denchhena meeting 215 chu khawpui 56-ah neih a nih tur thu te, Mizoramin a thlen tur B20 meeting ah G20 branding pawimawhna te sawiin, regional language leh English hman te, ram dang atanga lokal delegates leh officials tana hmuh nuam lo awm thei thilah khuhmawi/ masking hmundanga an tihdan te leh pawimawh dangte an sawi ho a ni.
Khawvel economy hmasawn zelna leh inrelbawlna atana ram hrang hrang intelkhawmna pawl – G20 hi Group of Twenty (G20) tihna niin, ram 19 – Argentina, Australia, Brazil, Canada, China, France, Germany, India, Indonesia, Italy, Japan, Republic of Korea, Mexico, Russia, Saudi Arabia, South Africa, Türkiye, United Kingdom leh United States bakah European Union te an tel a. G20 ramte GDP belhkhawm hi khawvel GDP 85% a tling a, khawvel pum huap insumdawntawnna 75% chu G20 rama thleng niin, khawvel mipui tam zawng hmun thuma thena hmun hnih chu G20 rama cheng an ni.
Kumtin G20 member ramte hian presidency nihna an inchelh chhawk thin a. Nikum khan Indonesia-in changin, kumin India ramin presidency a chelh chhung hian G20 meeting hrang hrang khawpui engemawzatah neih a ni dawn a. A meeting pui ber, G20 summit chu September thla khian New Delhi-a neih tum a ni.
Aizawl a G20 meeting thlen tur hi ‘B20’ tia hming vuah niin, “multilateral business partnership session” a hman tur a ni.