Lalhmangaiha Sailo
Holy Cross Bakery
9436360275
Jubilee hrang hrang Silver, Golden, Diamond leh Platinum Jubilee te hi base kawng hrang hrangin kan hmang thin a. Inneih Diamond Jubilee han thleng te phei hi chu a ropuiin, a lawmawm a. Tunlaiah hi chuan, Platinum Jubilee han thleng te pawh hi sawi tur an awm mai awm e. Gandhi Memorial High Sikul-in Platinum Jubilee an thleng chho a, ropui taka an lawm hi a ropuiin tih awm tak pawh a ni e.
Khawnge, mite ngaihdan leh hmuh dan ngaichang lem lovin he Jubilee ka hman dan leh ka hmuh dan te, thiante tel ve lote tan pawh a ni ang chu, kan tarlang mai mai teh ang.
A hmasain he Jubilee ngaihtuahtu Organising committee te leh Souvenir buatsaihtute hmalakna hi a thain tihdan an thiam em avangin an hlawhtling a ni. Dt 21-22.11.2024 ni hnih chhung programme fel tak duan lawk hmangtu zawng zawng ten nuam kan tiin kan kham lo hmel hlawm khawp mai. GM High Sikul chhuak hmun hrang hranga awmte tun aia tam kha han kal khawm phei ila chuan, haw leh mai tum lawk lova cham khawbangte pawh awm theihna hial tur niin a boruakin a hril tlat.
Ni khat chu, ka in chung Green House-a thlai chinna tur Bawngek leitha ka lo inkhawih berh luk laiin mi pahnih hi lo chhovin min rawn hmu chu, tute an nih pawh hre lo chuan ka in tuaifai thuak thuak a. Chibai bukin tute nge an nih, enge in duh te kan ti chul a. HT Vanlalsawma Headmaster leh Ngurhmingliana Sailo Sr Teacher GM High Sikul te chu niin an Sikul Platinum jubilee lawm an tum thu leh Souvenir te buatsaiha Article te pawh rawn thawh ve la te chu min ti a, engtin nge maw kei tehlul veng kilkhawra awm hi GM High Sikul lut ve tawh ka nih an hriat chu aw!! te ka ti mai mai a. Ka lehkhabu kan Diamond Jubilee lawm tuma kan siam MAMIT KAN VANGLAI tih bute chu an library a mi turte nen an khaichhuak ta a. A hnu deuhvah Upa R Lallianzuala Chanmari chu a lo leng lut leh nawlh a, la inhmelhriat lem lo, kei chuan a pi leh pu atanga ka hriat mi a ni a. Khuarei sulhnu te sawia hlim taka kan inkawm hnu chuan kum 1952-a GM High Sikul-a Pawl 7 kan luh kuma Pawl 8 ho leh kan hotute nena kan thlalak hlui tak ka lo tuaihnum te leh Souvenir a chhuah tur ka lo buatsaih (draft) te chu buaipui zui atan a khai haw ta nghe nghe a (Souvenir page 23-27)
Hetiang hian Zoram dung leh vang Zoram pawn thlengin GM High Sikul ex-student leh thawktu la dam te dap chhuakin Allumni Whatsapp Group te hawngin hei hian min thawng tho a, tel ve hman dawn lo leh thei lo tura inngaite pawhin thawhlawm remchang ang angin an rawn vawm khawm a. Thlalak hlui tak takte rawn post in, hei hian thian hlui classmate chanchin pawh inhre zui tawh lote thlengin min pawtkhawm a. A hlawhtlinna bul tak pawh a ni e.
Kum 1952 batch atangin mi 6 (paruk) dam kan la awm.
1. F Hmingthanga Republic
2. J Lalhmachhuana Kawltheihuan
3. Upa Hranghlua East Lungdar
4. C Chawngkunga Thakthing
5. Lalhmangaiha Sailo Zotlang
6. Laihnema Champhai vengsang
Anni ho hi kum 87 chunglam vek ni tawhin an hma batch ami te dam la awm tak maw!!
Jubilee an hmang dawn tih kan hriat atangin kal ve ngei tumin kan sawi hawtin kan inbuatsaih sauh sauh a. A hun a lo thleng, thiante an remchang ta lo. Chhungten thiante nen lova kal min ngaihtuah. Upa C Chawngdinga te nupa Helicopter-in an thleng chho tawh thu min rawn hrilh. Kan thian Laihnema Vengsang nen kan in contact thei hlauh, ani nen hian kum 60 zet inhmu tawh lo leh chanchin pawh inhre zui lo, a la dam tih erawh ka hria. Ani hian ka han tel theih phawt chuan min lo chiauau theih thu min hrilh chuan min tiphur zual a. Dt 20.11.24 chuan ka driver leh kan nau pakhat hruaiin Champhai kan pan ve ta, ka vahchhuah lohna a rei tawh nain kawngte a thain a lo shortcut ta deuh nen, chau lo takin hma takah kan thleng chho ve.
A lawm ni Dt 21.11.24- 10:30 AM chu a hun takah ka thleng chho chu, tlangval smart tak leh putar hmuihmul tuak sei tak leh sam tuak sei tak Fel Hut khum smart angreng tak si ten min lo chibai. “Pu Lalhmangaiha i ni em?” min ti zui. “Ni e, nang tunge i nih?” ka’n ti chu, “I thianpa Laihnema fapa ka nih hi,” tiin a bula putar ding chu “Ka pa a nih hi.” a’n ti chu ka phu zawk a, kan inchibai nawn leh, kan inpawm chuk chuk a. Chutih lai chuan Band Party mawi taka inthuam te chuan mawi taka Band tum chungin an hnungah Pu K Sapdanga te nupa in smart zetin an rawn zui. Keini kha khawi danga tawlhsawn hman ni tawh hek lo i, hotuten (organising committee) ten Home Minister lo dawng sawng hmasa tura an ruat ang maiin a hma berah kan lo ding. Pu Sapa’n min hmu chu, an nu nen chibai min rawn buk chu kan lawm hle mai. An hnunga hmelhriat awm chhun Er Maneiha kan hmu, Chanmari pa emaw ka tih chu Champhai chhuak GM High Sikul Ex Student chu lo niin, min ti tlangnel sawt a ni.
Fel fai takin Programme duan sa ang thlapin hun hman a ni a, Chief Guest Pu Sapa thusawi a ngaihnawmin a bengvarthlak a, Khuarei Sulhnu a rawn chhawp chhuak phei chu a Batch pui ni lem lo tan pawh a lunglenthlak tak meuh a, Centenary hun atan vawn that tlak a ni.
He Jubilee nawmna leh a hlimawm bikna riau chu maw!!! a lawmna item hrang hrang zirlaiten an rawn pho lan leh tunlai taka Talent nei tha tak tak ten zai leh thil mawi tak tak an rawn (show) pholan te leh Refreshment tuihnai tak tak kan chan ho te kha a ni mai lo, hrethiam lo deuh te pawh lo awm se thil awm ve tho a ni.
Keini Ex-Student Siniar tawh tak tak te tan chuan maw, mahni chauhva awm khawhar nite a kan ngaihtuah chhuah fo thin KHUAREI SULHNU- te mi ngaihtuah chhuah tirin, kha hun rei lo te chhung khan kum 70 – 20 kalta hunah kan cheng a. A hmun a hma a building zawng zawng te kha en khumin a tlangsir tlemte laih zawlah Assam Type building pawl 7 leh pawl 8 Class Room bakah Office te reuhte a Varanda bana Sikul dar motor wheelrim khai te kan ngaihtuahin kan mitthla a, a hnaivai leh tun hnai deuhte tan chuan an classroom hlui leh thutna tlar te kha an thlir a, thian hlui kal ve tih pawh inhre lo he huna inhmu phut inchibai leh lunglenga inkuah vawng vawngte khan min ti hlim a, Jubilee hlawhtlinna a va ni em!!!
Ropui ka tih leh ka chhiar nin theih loh chu hun harsa leh buai tak tak paltlang a, GM High Sikul-in kum 70 vel chhung leka a rah chhuah te, mi ropui leh mithiam tak takte an nei hi a ropuiin Pathian malsawmna a ni e. Platinum Jubilee Souvenir han thlir hian, an chanchin kan hriat riai ruai, mithiam leh mi ropuiten an Article rawn thawha an chanchin tlangpui a Bio data-an rawn ziak te hi a tha in, thangthar zirlai tan takte hian zir tham a awm e. An vaia ziak awm thei se a va tha dawn em!!!
Ka lawmna em em chu maw!! Champhai pawn lam atanga Jubilee hmangtu Ex Student zinga Upa ber nih lawmpuina – Dr C. Biakmawian a nupui Mrs Hawilopari Nghilhlohnan lehkha ka dawng hi a ni.
Gandhi memorial High Sikul vul zel rawh se.