Tunlaiin Mizoramah ganja a hluar a, excise force te chuan ganja ti thar pawh an tam, ganja pawh a tam an ti.
Mizoram Excise & Narcotics (MEN) department-in July thla thleng khan kuminah ganja hi kg 436.088 an man tawh a, hei hi tam tham tak a ni.
2024 hi MEN department-in ganja an man tam ber kum a ni der tawh a, May thlaah khan ganja man tam ber kum a ni daih tawh! May thla thleng khan kuminah ganja hi kg 406.719 an man a, kum dangah kum tluan pawhin hetiang zat hi an man ngai lo.
MEN department hotute chuan ganja hi Mizoram pawn atanga rawn lut a nih thu an sawi a, a tam ber chu Tripura atanga rawn lut a ni ang an ti.
Tripura atanga lut hi uluk taka cheibawl a nih thu an sawi a, tha taka fun thlap a nih thu an sawi.
Shillong atanga lak a tam bawk tih an sawi a, Shillong atanga bawngsa lakluh karahte hian an rawn zep thin an ti.
MEN department hotute chuan ganja hi thangtharte zingah intihhmuh an awm tih an sawi a, meizial anga ngaiin an zu a, an nu leh pate hriat lohvin, ruihhlo ti-ah pawh an inngai lo emaw tih turin an zu tiin an sawi. A hlauhawmzia leh thluak tibuai thei a nih dan te inzirtir a tul thu an sawi bawk.
Mizoramah ruihhlo a hluar han tih hian rilruah heroin a lang thin mai thei a, a mantu lam chuan ganja pawh a hluar thu leh a invenna lamah tanlak a tul thu, ruihhlo donaah pawh ganja dona lamah tan a tul thu te an sawi.
Mizoramah ruihhlo a hluar tia sawi a nih rual hian thu lawmawm lam pawh a awm; hman ni lawk thlenga hluar pseudo-ephedrine thawm a reh telh telh a, MEN department-in kuminah an la man lo. Ruihhlo hlauhawm opium-in Mizoram a la luh chilh lovah ngaih a ni bawk a, kuminah an la man lo. Meth (methamphetamine) pawh a thawm a reh sawt hle; a hma angin meth hi man tur a tam lo a, meth lakah hian Mizoram a la himah ngaih a ni. Meth hi April thla thleng khan MEN department hian kg 112.528 an man a, hemi hnu hian an man belh tawh rih lo.
Ganja a hluar, man tur a tam
