Gaza-ah ei tur lut mah se a la tam tawk lo – WFP

Gaza-ah ei tur lut mah se a la tam tawk lo – WFP
UN World Food Programme (WFP) chuan US rawtna anga Gaza-a inkahhai puan a nih hnuah puihna phurh luh chu a tam sawt ngei a; mahse, ni tin ton 2,000 luhtir tum chu hmun hnih chiahah ramri kânna hawn a la nih avangin an la phak lo hle niin a sawi a. Tam tlakna, hmar lamah phei chuan ramri hawn a la awm lo.
Gaza Strip-ah hian ni tin ei tur metric ton 750 lut ziah ang a ni tawh tih WFP chuan a sawi a; mahse, kum hnih chhung Israel leh Hamas indona avanga chhe vek tawha awmte tan kham a la ni lo tih an sawi.
“Thawn luh tam tur hi chuan border crossing point zawng zawng hawn nghal vek a ngai a ni,” tiin WFP thupuangtu, Abeer Etefa-i chuan Geneva-a thuthar lakhawmtute a kawmnaah a sawi.
Etefa-i hian Gaza-a luh theihna, Israeli-te thunun chu pahnih chiah, chhim lama Kerem Shalom leh a lailia Kissufim chauh hawn a ni tih a sawi.
US President Donald Trump-a rawtna anga inkahhai puan a nih chhungin Gaza-ah ‘a nih dan tur angin’ puihna lut tura tih a ni a. Israeli venhim hna thawktu hotu chuan puihna hi Kerem Shalom leh ramri kânna dang, a hming a sawi lan loh kaltlanga phurh luh reng a ni tih a sawi.
Israeli Prime Minister Benjamin Netanyahu-a chuan Inrinni khan Gaza leh Egypt inkara mi, Rafah border crossing chu la khar a ni dawn tih sawiin Hamas-in an mi hren thi tawhte ruang an hlan let dan azirin hawn leh hawn loh a innghat niin a sawi.
UN hnuaia naupang lam changtu pawl thupuangtu, Ricardo Pires-a pawhin Thawhtanni khan puihna lut chu a la tlem hle a, ramri zawng zawng hawn thuai a tul tih a sawi.
Naupang leh nau paite mamawh chaw tha chu chhim lam atangin hmar lamah a lut ve thei a; mahse, a la tlem hle tih Etefa-i chuan a sawi bawk.
“Gaza City emaw, Gaza hmar lam emawa phurh luhna tur a la awm lo,” a ti a. WFP chuan chhim leh hmar inkalpawhna ber, Salah al-Din road kal phalna an la nei lo niin a sawi a ni.
Ei tur phurh luh tawhte chu mi nuai nga vel chawlhkar hnih daih vel a ni tawh tih a sawi a. Gazan tam takten tihtawp leh a nih mai an hlauh avangin an hmuh theih ang ang an chhek niin a sawi.
“Tlem an ei a, a rualkhaia insemin rikrum atan an dah tha then a. Inkahhai hian engtia rei nge a awh dawn leh eng nge lo thleng leh tur an hre tlat lo a ni,” a ti.