Gaza Strip a Palestinians te chuan World Central Kitchen (WCK) tena an aid workers pasarih Israel air strike avanga an thih hnuah engtiangin nge ei leh bar an neih theih ang tih chu zawhna lian tak a ni.
US charity dang Anera te pawhin an local staff leh family tena harsatna an tawh nasat zel avangin operation an nei zui duh tawh lo bawk a.
WCK leh Anera te hi Palestinian territory a kartina eitur million hnih lai pe thin an ni a. UN chuan Gaza a cheng mipui zahve 1.1 million vel te chuan tam an tuar thei reng tiin a sawi bawk.
WCK tena an hnathawh an chhunzawm loh avang hian Cyprus atanga maritime aid corridor an siam pawh tihtawp zui nghal a ni a, he corridor hi charity group te hian Gaza a tanpuina pekluh nana an siam a ni.
WCK convoy chu Thawhtan zan khan tanpuina phura Deir al-Balah warehouse a ei tur 100 tonnes chuang a dah fel hnuah Israeli missile ten an kap fuh a ni.
Norwegian Refugee Council chuan “World Central Kitchen chunga thil thleng hian aid system pumpui dinmun derthawngah a siam a ni” tiin a sawi zui bawk.
WCK chuan Israel sipaite chu an vehicle charity logo chiang taka inziak leh Israel thuneitute pawhin an remtih thlap leh phalna an pek a ni chunga an bei chu na takin an dem a ni.
Israel military chief of staff Lt Gen Herzi Halevi chuan WCK convoy beih chu tihsual pawi turu tia sawiin hriatfuh loh vanga thil thleng tiin a sawi a.
Hmalakna nasa zawk an kalpui tur thu leh aid worker te him zual zawk nana hmalakna an kalpui tur thu leh humanitarin command centre thar an din nghal thu a sawi a. “Israel hi Gaza mipuite nen kan indo lo, Hamas-te nen a ni kan indo ni” tiin a sawi zui bawk.
Mahse aid group te chuan Israel intiamna chuan awmzia a nei dawn em an chiang ngam lo an ti thung a. Nikum October thla atanga indona chhuah hnuah Palestinian aid worker 196 in nunna an chan tawh tiin an sawi.
Jan Egeland, secretary-general of the Norwegian Refugee Council leh UN humanitarian chief hlui ni bawk chuan WCK te chu Israelis te nena tanpuina lama thawkdun nasa ber an ni a ti a, Israel te hnenah an workers te awmna leh chetdan tur engkim hrilh hre reng an ni a ti bawk a.
WCK te chu Gaza a tanpuina lama hnathawk nasa ber niin Palestiani staff ringawt pawh 400 an nei a, community kitchens leh distribution system 68 a neihah hnathawk 3,000 chuang an awm a ni.
WCK te hian international organisation tena 193,000 tonnes of aid an pekluh atanga 12% lai an thawh niin Cogat, israeli defence ministry body te chuan an sawi a, UN agencies te chu a bang zawng thawhtu an ni.
WCK’s founder, chef José Andrés chuan thil awmdan enfiaha thlithlaina an neih mek thu leh engtiangin nge an kalpui zel dawn an la chiang lo tiin a sawi.
WCK te nena thawk duna nikhata eitur 1,50,000 semchhuak thin Anera te pawhin an hnathawh an chhunzawm lohin engtianga nasa in nge Palestinians te a nghawng dawn an hrefiah chungin an Palestinian staff te leh an chhungte him lo lutuk avangin kalpui chhunzawm thei an ni lo tiin an sawi bawk.
Charity logistics co-ordinator fapa chu Deir al-Balah March thlaa Israeli air strike avangin a thi an ti a, Deir al-Balah chu Israel military tena an awmkhawmna tura a siam a ni chungin a bei tho a ni an ti bawk.
“Eng vangin nge beih an tawh tiin sawifiah turin kan phut a, engmah chhanna kan la dawng lo” tiin Dere Madsen, Anera a hotu chuan a sawi a. “Heng hmun te hi hriatchiansa a a ni a, chuti chunga beih a tawk tho chu kan hrethiam lo a ni” tiin a sawi bawk.
Gaza mipui te tan chuan WCK ten operation an chhunzawm lo chu tam nasa zawk, naupang tam zawk thihna, natna punna tur a ni ang, tiin Egeland chuan a saiw bawk.
World Health Organization chuan nikum October thla atang khan indona vangin naupang 27 chu malnutrition vangin an thi tawh tiin a sawi a.
Egeland chuan Israel chu northern Gaza pawhna leh aid convoy ten awlsam zawka an luh theihna tur Karni leh Erez border crossing te chu hawng turin a ngen bawk a.
Tunah rih chuan convoy tin te chu Israeli thunun Kerem Shalom leh Egyptian thunun Rafah crossing atang chauha luhtirin convoy te chuan UN in ‘high-risk areas’ a tih lai an paltlang zel a ngai a ni.
Cogat chuan Israeli sipai te chuan hmarlam atangin tun hnaih thla hnih chhungin tanpuina phur lorry 500 chuang an luhtir tawh tiin a sawi bawk.
Hei bakah hian Israel chuan tuna khar rih WCK te din maritime corridor bakah Western leh Arab ram tena tanpuina vansang atanga an thlak a remti bawk a. UN chuan chungte chu a pawimawh em em chungin liantham taka leilama tanpuina thawnluh chu a tluk thei lo tiin a sawi thung.
WCK aid ship tanpuina 200 tonnes phur in Gaza thlen nan ni eng emaw zah a mamawh laiin lorry chuan tanpuina 20 tonnes chu northern Gaza lamah 40 km leka thui zawhin a thlen zung zung thei thung a.
C-130 transport plane chuan 21 tonnes a phur thei a, mahse airdrops tum 40 chauh la thlengin chubakah a man a to em em a, lei lama awm te tan a hlauhawm bawk.
United Nations chuan March 1 atanga 28 chung khan Gaza ah lorry 159 lut ang ziah a ni a ti a, indo hma chuan lorry 500 in nitin an lut thunga ngaih a ni a ti a. |anpuina lut a tlem avangin harsatbna a tawk a ti bawk.
Gaza ah tam a tla thei reng, harsatna a nasa
