Gaza-ah an zawlpui ber Hamas te chuan beih an tawh mek laiin Iran Quds Force hotu lu ber chuan February thla khan Beirut a tlawh a, Israel chuan Lebanon a Hezbollah te chu bei mai thei dinhmunah a ding tia sawiin chutiang a nih chuan Tehran regional partner ber te chuan derthawngin an awm theih dawn vang a ni.
Beirut khawpuiah Quds chief Esmail Qaani leh Hezbollah leader Sayyed Hassan Nasrallah te chuan inbiakna neiin October 7 a Hamas tena Israel an beih hnua tum thum lai an inhmuhna a ni tawh.
Israel chuan Lebanon hmarlama Hezbollah te hmunpui chu a beih mai hlauhna a lian hle a. Shia Islamist group te sawpchauh a tum a nih chuan Iran chuan lohtheihlohin inrawlhna a nei ngei dawna ngaih a ni bawk.
Tun hnai thla nga chhungin Israel hmelma kumhlun Hezbollah te chuan Hamas te an thlawp zia lantir nan Israel hmarlam ramri lamah rocket a kapchhuak chamchi bawk a.
A hmaa meeting an neih tawh ang bawkin Nasrallah chuan Qaani chu israel emaw United States nen emaw Hezbollah tena inbeihna an neihah Iran chu hnuhluh an tum lo tiin a hrilh nia sawi a ni a.
“Hei hi chu kan indona a bi” tiin Nasrallah chuan Qaani hnenah a hrilh tiin Iranian sources te chuan an sawi a ni.
Indona nasa tak awm thei reng a nihna erawh chiangin Lebanon a ramri hnaiha cheng te mi sing tel tehmeuh te chu hmun him zawkah thiarhin an awm mek tawh thung.
Israeli strike hmangin Hezbollah fighter 200 chuang tihhlum ni tawhin civilian 50 chuang an thih phah bawk tia sawi a ni a, Lebanon ram atanga israel beihna avang pawhin Israeli sipai eng emaw zahin nunna chanphah tawhin civilian nunna chan paruk an awm tawh bawk.
Tun hnaiah Israel chuan Hezbollah te abeihna a ti na tial tial a. February thla pawh khan Israeli Defence Minister Yoav Gallant chuan Israel chuan ramri hnaiha Hezbollah fighter te chu nawr tawm vek a tum thu a lo sawi tawh a ni.
Israel chuan buaina dang a melh loh thu sawi bawkin mahse a tul a nih chuan Israel chuan a ram himna atan khawi hmunah pawh indona kalpui a inpeih reng tiin a sawi bawk.
Israel leh Hezbollah te chuan indona chuan Lebanon zauzawk a kankai hlauhna neiin indona a zau zual zel a nih chuan Iran nuclear installation tan pawha pawi thei a nihna an hrechiang tia sawi a ni bawk a.
US chuan Iran chu state sponsor of terrorism kalpuia a puh niin kum tam tak chu Tehran nuclear program tihtawp a nih theih nana hmala tawh niin Israel chuan Iran chu a hmelma kumhlun ber a angaih a ni bawk.
Beirut meeting hian Iran chuan helai region ah buaina zauzawk chuak zui lo se a duhna a tarlang tia sawi niin chutihrual chiah chuan West Asia pumah leh Gaza ah Iran chuan Iraq, Syria leh Yemen a armed group te hamng tangkaiin theih tawpa Israel beih nan chet a la reng thung tia sawi a ni bawk.
Qaani leh Nasrallah te hian fighter sing tel neiin chumai bakah rocket leh missiles an nei ngah hle bawk a. Tehran network a allies leh proxy militia te enkawltu ber niin Qaani enkawl elite Quds Force te chu Iran a Revolutionary Guard hnuaia foreign legion te an ni.
Hezbollah te chuan Israel in Gaza a beih a titawp a nih chuan Israel an beihna an tihtawp nghal tur thu a sawi a. Mahse, US Special Envoy Amos Hochstein chuan karkalta khan Gaza a inkahhaina chuan southern Lebanon boruak tang a titawp zui dawn tihna a ni lo a ti thung.
Arab leh Western diplomats te chuan Israel chuan a ramri hnaiah Hezbollah fighter rual an awm a remti tawh dawn lovah an ngai a, a chhan ber chu Hamas tena beithuta mi 1,200 chuang tihluma lung in tang 253 lai an hruai ang a thlen leh an hlau a ni.
Lebanon ah indona awm se Hehzbollah te chakna nasa taka tihhniamin awmse chu chu Iran tana pawi ber tura ngaih a ni a, Hezbollah te hi kum 1982 a Israel bei tur hrim hrima din niin Iran in a thlawp bur a ni bawk.
“Hezbollah te hi Iran tan chuan first line of defence a ni” tiin Abdulghani Al-Iryani, senior reseacher, Sana’a Center for Strategic Studies chuan a sawi.
Israel in Hezbollah te nasa taka beih a tum a nih chuan Tehran chuan a proxy war kalpui chu nasa zawkin a kalpui ve leh nghal ang tia sawi a ni bawk a.
Iranian Supreme Leader Ayatollah Ali Khamenei chuan Iran ram chhungah lungawilohna nasa tak a awm mek laiin indona hmachhawn a duh lo tia sawi a ni bawk. “Iranians te hi pragmatists an ni a, indona zauzawka a kal an duh lo” tiin Irayani chuana sawi a.
“Israel chauh beih tur ni se chuan an inhuam ang a, mahse, indona zauzawka a kal a nih chuan United States chuan Israel chhanin indonaah a lut ve dawn tih an chiang a ni” a ti bawk.
Hei vang hian Gaza buaina chu helai region ah zauzawka a arh an duh lo tih a ni bawk.
Gaza buaina zau zawka a arh duh lo
