Gaza-a Israel-Hamas buaina thla 10 chuang awh tawh chinfel a nih theih nan Cairo khawpuiah high-level talks neih leh niin Pathianni khan inremna siam thei lova tihtawp zui a ni tiin US official te chuan an sawi a. Mahse, inremna a awm theih nan inbiakna chu neih chhunzawm tum zel a nih thu sawi a ni thung.
Inremna siam a nih theih nan lower level ‘working teams’ te chuan Cairo khapwuiah mediator United States, Qatar leh Egypt te nen inbiakna an la nei zui dawn tia sawi a ni a.
Officials te chuan kar kalta Ningani atanga inbiakna neih tanah thil tam takah hmasawnna a awm tia sawiin inremna siam theih ngei a nih beiseina an neih thu an sawi bawk.
Inbiaknaah hian CIA director William Burns leh Israel Mossad intelligence agency head David Barnea te pawh an tel a. Hamas aiawh te tello thungin mahse Egyptian leh Qatari mediator te chu an aiawhah an tir thung a ni.
Hetih lai hian Pathianni khan Lebanese militant group Hezbollah leh Israel te chuan nasa taka inralkaisan an nei a, thla tam tak chhunga inbeihna nasa ber a thleng ani.
Hezbollah te chuan rocket leh drone za tel hmangin Tel Aviv bul hnaa Israeli military intelligence site an beih thu an sawi a, Israel chuan Hezbollah te chu na taka a beih thu a sawi ve bawk.
Hezbollah leader Hassan Nasrallh chuan Israel an beihna chu thla kaltaa Beirut khawpuia an leader thah a nih phuba lakna tiin a sawi a. Gaza ceasefire talk avangin an chethma theih loh thu sawiin chumai bakah Iran thlawp militant group dang te nen Israel beih dan turah inrawnkhawmna an nei tiin a sawi bawk.
“Pathiannia kan beihna kha a tawk lo kan tih chuan a hun kan tihah nasa zawkin kan bei leh mai ang” tiin Nasrallah chuan a sawi a. Hezbollah te chetna chungchangah Yemen a Houthi rebel leh Iran te chuan engmah sawi an la nei lo thung.
Israel leh Hezbollah te chuan military target chauh an bitum tiin an sawi ve ve a. Israel chuan Hezbollah te beihna chuan military target pakhatmah a fuh lo tia sawiin mahse a sipai pakhatin nunna chanin pahnihin hliam an tuar tiin a sawi a. Hezbollah fighter pahnih leh allied group militant pakhatin nunna an chan tiin Hezbollah te chuan an sawi ve thung.
Israeli Prime Minister Benjamin Netanyahu chuan Israel missile te chuan northern Israel beih nana chhawpchhuah rocket sang tam tak te a thlurbing tiin a sawi ve thung a. “Tun hi ka sawi nawn ang, a tawpna tur a ni lo” tiin a sawi zui bawk.
Israel military spokespersin Rear Adm. Daniel hagari chuan Israeli plane te chuan target 270 fuhin chung zinga 90% te chu rocket launcher Israel beih nana chhawpchhuah te an ni a ti bawk a. Israel kahna rocket tam ber te chu kah thlak an ni a ti bawk.
US President Joe Biden chuan Israel leh Lebanon a thil thleng chu uluk takin a thlithlai reng tiin Sean Savett, National Security Council thupuangtu chuan a sawi a. Pentagon pawhin Defense Secretary Lloyd Austin chuan Israeli counterpart Yoav Gallant chu biain US carrier strike group pahnih te chu middle east region a tawi khawmuang turin a ti bawk.
Hebollah te hi non-state militant zinga khawvela thiltithei ber anga ngaih niin Hezbollah te hian rocket 150,000 vel zet Israel khawi hmun pawh kap thei an nei tiin United States leh Israel te chuan an sawi bawk a. Hezbollah te chuan Israel defense bum thei drone leh precision-guided munition pawh an nei tiin an sawi bawk.
Israel chuan Hezbollah beihna tin te chu chhanlet intiamin, multi-tiered missile defence system tha zet a nei bawk a. Chu mai bakah Israel chu US-in a thlawp tlat niin kumina Iran atanga Israel kahna missile te pawh US chuan a kahthlaksak nasa a ni.
Hezbollah militant te hi Iran thlawp tlat an ni a, Iran chuan thla kaltaa Tehran khawpuia Israel-in Hamas leadr Ismail Haniyeh a thah chungchangah phuba a lak tur thu a lo sawi tawh bawk.
Gaza buainain reh lam pan thei lo
