India ramin zalen kum 75-na lawmna, Azadi Ka Amrit Mahotsav (AKAM) kalzelah August 25 khan Social Welfare & Tribal Affairs Department, Women & Child Development Department leh National Commission for Women tangdun buatsaihin gender budgeting chungchang sawrkar official-te inhrilhhriatna Aizawlah buatsaih a ni.
He hun hmanpuitu SW&TA minister Er. Lalrinawma chuan ‘gender budgeting’ chu hmeichhia leh mipa, khua leh tui zawng zawngte tana tih bik nei loa an mamawhna zawn zela an hamthat tlanna tur chungchang a ni, tiin, hmeichhia leh mipaten intluktlang taka hmasawnna an chan theih nan sawrkar chuan gender budgeting hi hmanraw tangkai leh thil tithei tak ni tura a ngaihte zing ami a ni tih a sawi.
Gender budgeting hi sum hman dan tur ruahmanna satliah mai niloin, hmasawnna tur duannaah, a tihpuitlinna kawngah leh hmalak tawhna thlirletnaah hmeichhia leh mipate dinhmun inan lohna hre chung a, a rualkhai thei ang bera ruahmanna siamna a ni, tiin a sawi bawk.
“Tunlai khawvelah chhungkuaah, ram leh hnamah hmeichhia leh mipa dinhmun inan lohna tam takten ngaihpawimawh an hlawh hle a, dinhmun hnuaihnung zawka ding fo thin leh chak lo zawka dah thin hmeichhiate dikna leh chanvo humhalh duhna a nasa zel a, tlawmngai pawl bakah sawrkar ngei pawhin kawng chi hrang hrangin hmeichhiate dinhmun siamthat nan hma a la mek a. Ram hmasawnna rah thate pawh hmeichhiaten an chan ve ngei duhna a lian telh telh a, chumi atan chuan hmanraw chi hrang hrang hmangin hmalak mek a ni,” a ti.
Gender budgeting zirnaah hian Women & Child Development director Zoramthangi Chhangte chuan ‘Mission Shakti: Gender Budgeting (SOP) – an overview’ thupui a sawizau a. Resource person pahnih – Social Welfare director hlui Laldikkimi leh MZU atangin Prof. Lalhriatpuii te paper present zir ho a ni.
Gender budgeting zir ho
